Ginikanan ug Anak

Gisulod og sako, gipalayas, gipriso, wala pakan-a, giyawyawan, giboyboy ug uban pa nga mga kasinatian gikan mismo sa ilang mga ginikanan.

Abi nako og kaniadto ra kini nahitaho ilabi na sa mga remote area apan nahitabo usab diay kini karon taliwala pa man nga aduna nay balaod nga nagtan-aw sa katungod sa kabataan.

Subo kaayo nga realidad apan mao kini ang kamatuoran nga angayan hinuktokan kay basin og nataligam-an lang sa mga ginikanan kinsa nagtuo nga ok lang kini pagabuhaton ngadto sa mga anak.

Seguro ang yawyaw tolerable lang basta dunay basehan nga yawyawan ang anak dungan sa pagpasabot sa hinungdan aron mahigmata usab ang mga anak sa sayop nila.

Apan ang pagdagmal sa lawas o corporal punishment dili gyud kini acceptable sa atong katilingban.

Ang ingon niini nga problema sa mga bata nahisgotan atol sa gipahigayon nga recollection eskwelahan diin nagtungha usab ang akong niadtong Sabado. Nagsentro ang hisgotanan sa kamahinungdanon sa pamilya sa pag-umol sa responsableng molopyo sa atong katilingban.

Unsa man ang responsibilidad sa mga ginikanan sa pag-umol sa kinaiya sa mga anak? Matod pa sa facilitator sa naasoyng recollection nga si Mrs. Divina Rama nga ang kinaiya sa usa ka tawo nagsugod gikan sa pa sa pagsamkon niini sa sabakan sa inahan hangtod na nga gihimugso ug sa pagtubo niini.

Panahon nga gibuntis pa ang anak nagsige na og konsumisyon ang inahan tungod kay buloyogon kaayo ang bana, ang pinitik sa kasing kasing sa mama maoy mabati sa bata sa iyang tago angkan.

Inig gawas niini sa kalibutan duna gyuy molutaw nga epekto niini sa kinaiya sa bata ilabi na sa batasan niini. Nan karon kong kusog kaayo motubag ang anak o kaha buloyagon pud maong kanunay mayayawan o madapatan, suwayan nato og susi ang atong kaugalingon kon giunsa nato sila sa pag amoma sukad sa pagsugod sa pagpitil sa sabakan sa mga inahan.

Basin naay uban nga naghuboghubog na kay gibuhat kini dihang nakainom ang amahan, naay sapoton o daling masuko nga bata kay gihimo kini nga kontra gusto ang inahan, kadtong malipayon nga bata seguradong gihimo nga puno sa kalipay ug pagmahal sa mga ginikanam. Ako isip amahan dili man sad perpekto kay mangasaba man sad ko sa akong mga anak basta makasala sila. Apan sukad ma sukad wala gyud na sila makatilaw bisan kusi sa panit tungod kay nagtuo ako nga mas hait ang pulong sa ginikanan nga motuhop sa galamham sa mga anak basta gipaid ang pulong sa pagmahal.