EDITORYAL - Modernisasyon sa AFP

Giangkon ni Defense Secretary Delfin Lorenzana sa House of Representatives nga huyang gyud ang kapabilidad sa Pilipinas aron mabantayan ang teritoryo niini.

Kun nakaingon pa gihapon niini si Lorenzana, samot na tingali kun wala molihok si kanhi presidente Benigno Aquino III nga sa tinud-anay sa iyang termino ra nilihok ang Republic Act 7898.

Kini ang P50 bilyones nga AFP Modernization Act nga niadto pa untang Pebrero 1995 panahon ni kanhi presidente Fidel V. Ramos napasar ug 15 ka tuig kompletohon.

Apan napupos nalang ang termino ni Ramos, dayon kang Joseph Estrada ug Gloria Macapagal Arroyo way napalit ang AFP kay way pundo.

Sa paglingkod ni Aquino (2013), paso na ang RA 7898 maong giamendahan kini aron mas mapadali ang pagpalit og mga gamit alang sa AFP.

Gihimo kini samtang ang gobiyerno nakigtigi sa China didto sa Arbitral Tribunal kay niadto pang panahon nilang Ramos, Estrada ug Arroyo nagtukod na sila og mga estraktura sa mga teritoryo sa Pilipinas sa West Philippine Sea.

Samtang gikumbati ang kaso batok sa China (diin midaog ang Pilipinas), nakasugod sab dayon ang Department of National Defense og proseso sa pamalitong gamit para sa AFP apil na ang Coast Watch System, radars, fighter jets, barko ug uban pa diin ang uban gigamit na karon.

Nakatabang sab ang mga donasyon ug gipamalit nga second hand nga mga gamit sama sa duha ka mga kanhi coastguard cutters sa Amerika nga gipangsuporta sa mga karaang mga barko sa Philippine Navy ug nagpatrolya karon didto sa WPS ug kadagatan sa nasud, samtang wala pa mangabot ang mga gi-order nga mga modernong barko.

Daghan ang wala masayod nga ang tanang brand new nga mga gamit sa AFP gikan sa abroad tinuig kun buhaton mao nga karon pa ni nangabot.

Uwahi na kaayo kay nakatukod na og mga artipisyal nga mga isla ang China sa WPS. Apan bisan pa man nauwahi ang pundo magamit gihapon ang mga mapalit sa umaabot pang katuigan.