Nakalapas sa lagda sa trapiko

Dear Atty. Divine,

Usa ko ka driver og de pasaheroan nga jeep sud na sa lima ka tuig. Last week duna koy na-engkwentro nga traffic enforcer kay iya kong gidakop for traffic violations. Di man gud maklaro ang signage mao nga nangatarungan ko ug nasuko ang enforcer ug atol sa among panaglalis mihulga siya nako nga dad-on ko sa presinto ug prisuhon. Ang akong pangutana kun pwede ba diay mapriso ang driver tungod sa traffic violations? Daghang salamat.

Joey

* * *

Dear Joey,

Basi sa atong balaod, kon ang usa ka driver makahimo  og kalapasan sa lagda sa trapiko, mamahimo kining sitahon sa police o traffic enforcer ug tan-awon ang iyang driver’s license  ug rehistro sa sakyanan, human niini isyuhan siya og citation ticket og aduna siyay 15 ka adlaw sa pag-settle sa iyang multa tungod sa iyang nahimong kalapasan. Anaa mismo sa guidelines sa mga traffic police nga dili sila dapat makiglalis  sa mga driver.

Apan kinahanglan sab nga dili makiglalis ang driver kanila aron di mo ma-charge og laing violation. Sa imo nga kaso, kun traffic violation lang ang imong nahimo di gyud ka pwedeng prisuhon kay multa ra man ang silot ana ug kun di ka mobayad sa multa within 15 days, ang pwede nilang buhaton mao lang ang pagsuspenso sa imong lisensya ug kun bug-at ang violation pwede sad kining kabasihan sa pag-revoke  sa license. Posibleng gihulga ra ka sa enforcer nga prisuhon but next time mas maayong di nalang gyud ka makiglalis mas maayong imo nalang kini nga hangyuon aron di ka maisyuhan og citation ticket. Thanks and God bless.

Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St. Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.