Trapiko

Taud-taud na nga problema sa dakbayan sa Sugbo ang kahuot sa trapiko.

Usa sa mga gitumbok nga hinungdan niini mao ang mga depektoso na nga traffic lights dinhi sa dakbayan.

Nunot niini, gisugyot sa kadagkoan sa Cebu City Transportation Office (CCTO) ang pag-upgrade sa traffic system sa dakbayan. Sa kasamtangan gigamit sa syudad ang Sydney Coordinated Adaptive Traffic System (SCATS) sulod na sa 30 ka tuig.

Karaan na gyud ang maong teknolohiya ug lisud na nga ayohon ang depekto tungod sa kanihit sa pisa.

Gani dihang naguba ang digital board niini niadtong miaging semana nasinati gyud sa dakbayan ang dakong problema sa trapiko.

Matud sa mga opisyal sa CCTO nga napugos sila sa pag-ayom-ayom sa naguba nga pisa gamit ang mga karaan na nga digital board tungod kay wala nay pisa nga baligya. Sa ato pa way kasigurohan hangtud kanus-a moluntad ang giayom-ayom nga pisa.

Mao nga dinalian ang panginahanglan sa pag-upgrade sa atong traffic system.

Niadtong Biyernes giduso na sa executive department ang P2.5 billion nga supplemental budget 2 diin nalakip ang P250M, katunga sa P500M nga gikinahanglan alang sa bag-ong traffic system. Basi sa sugyot sa CCTO, ang bag-ong traffic system maglakip ni og sensors, CCTV, traffic volume detector, ug command center.

Basi sa signal sa traffic volume detector himoong priority sa system ang mga dapit nga huot ang trapiko.

Makatabang sab ang mga cctv pagmonitor sa mga badlongon nga driver ug pag-imbistigar og krimin.

Walay lalis nga ato ning gikinahanglan tungod kay nabiyaan na ang dakbayan sa Sugbo sa mga silingan niining syudad kun ang hisgutan ang modernong traffic system. Apan atong hinumduman nga ang gubaon ug karaan nga traffic system usa lang sa nakatampo sa kahuot sa trapiko.

Ang nag-unang hinungdan mao ang kadaghan na gyud sa mga sakyanan. Ang pagpaminus sa gidaghanon sa mga sakyanan diha sa kadalanan pinaagi sa dinalian nga pagpatuman og mass transport system maoy labing epektibo nga sulosyon sa trapiko.

Laing angayang hatagan og pagtagad sa dakbayan mao ang paghawan sa kadalanan gikan sa mga sakyanan nga illegal nga giparada daplin sa karsada. Angayang hunongon na sab sa dakbayan ang pagnegosyo sa atong kadalanan pinaagi sa paghimo niini nga pay parking zone.

Pananglitan usa sa mga hinungdan nganong maghuot ang trapiko sa dalan Pelaez kilid sa University of San Carlos mao ang pay parking kilid sa karsada. Imbes ang tibuok karsada magamit sa mga motorista nga moagi, katunga nalang maoy kaagian.

Pun-an pa sa mga magpaugat nga mga PUJ driver, magkaguliyang gyud ang dagan sa trapiko.