Bayad-utang na loob
MULA sa baba hanggang mataas na puwesto sa lipunan ay nakatatanggap ng regalo sa sinumang napagkalooban ng tulong. Maliit na bagay lamang ito kung ating susumahin. Tayong mga Pilipino ay mayroong kulturang tinatawag na utang na loob kung saan nagbibigay ng pasubali ang natulungan sa pamamagitan ng munting regalo.
Para sa akin wala akong nakikitang mali sa sinabi ni Pres. Digong na puwedeng tumanggap ng regalo ang mga pulis. Ako mismo, hindi ko maiwasang magbigay ng konting gantimpala sa mga taong tumutulong sa akin kahit sa simpleng paraan.
Halimbawa tuwing akoy tumatawid sa pedestrian lane at kapag naghihintay ako ng taxi, merong mga traffic enforcer na tumutulong sa akin bilang ganti binibigyan ko sila ng konting meron ako. Wala kaming nilabag na batas dahil kusang loob ko itong binigay. Hindi man sila humingi ng kapalit pero nasa atin na kung magkukusa ba tayong tulungan ang mga taong tumulong sa atin.
Hindi naman porke’t tumanggap na ng regalo ay matatawag na natin itong suhol. Oo nga’t may mga kotong cops sa samahan pero mas marami pa rin namang matitino sa hanay ng pulisya. Ang suhol ay halimbawang may violation ang isang motorista at idinaan na lang sa usapan upang hindi na nagkatiketan pa.
O kaya naman, pinara ang isang motorista kahit na walang nagawang violation at humingi pa ito ng padulas, ‘yun ang suhol. Diyan sa BIR at Bureau of Customs, hindi masawata ang suhulang nangyayari. Milyones ang transaksyon.
Iwasang bigyan ng kulay ang regalong natatanggap, hindi naman nila ito hiningi kundi kusangloob na binigay ng mga taong tinulungan. Marapat lamang na sila’y gantimpalaan.
- Latest