PLDT repairmen nalingaw

Hulyo 12, Biyernes, pag-uli nako gikan sa trabahoan, midiretso dayon ko’g lingkod sa akoa mismong computer table aron manghagdaw og mga maayong liso nga nindot itanom sa limitadong panid ning akong lindog nga mogawas matag Domingo, Lunes ug Biyernes.

Puwerte nakong guola. Kay daghang nag-aso-asong isyu nga akong gisunod sama sa naghinangat kulba-hinam sa away nilang Thurman ug Pacquiao didto sa MGM Grand Garden Arena, Las Vegas, Nevada, diin akong higalang Gado (aka: Michael Kakilala), food server ni Manny, mipadala nakog video nga gikantakantahan rang Manny ang umaabot away nilang Thurman.

More on bonding-bonding ug parelaksrelaks lang ang tumong sa maong okasyon. Nagpakita nga wala gyod ma-stress si Manny sa gipalupad nga mga hambog ni Thurman.

Ug mao ni ang hinungdan sa akong kaguol. Unsaon man pag-email sa mahuman kong artikulo nga guba man among internet?

Unya, bisag gitawagan dayon sa akong anak ang PLDT sa maong adlaw sa pagkaguba, mipahibalo ang in-charge, nga molanat pa kunog 72 hours or 3 days, ayha pa atimanon sa pag-ayo. 

Pagka Hulyo 16, Martes sa hapon (5 ka adlaw gikan sa pagkaguba), mitungha ang duha ka PLDT repairmen sa amoa ug giilisag bag-o ang daan, gubaong nilang  intenet conection gadget. Haskang dalia ray diay. Wa abtig 10 minutos, ayos dayon!

Giingnan ko ang repairmen nga importante kaayo nako ang internet. Kay kun maguba ni, maguba sab ang mga adlaw sa pag-email sa akong mga artikulo ngadto sa The Freeman Banat News publishing.

Pagkahibalo nila nga tigsulatan diay ko, naikag sila sa pagpaabli sa akong sinulat. Busa, gidala ko ilang atensiyon sa Banat Opinion window, diin ako ang nangunay pagbasa sa napublikar kong artikulo bahin niadtong mga badlongong motoristang gidakop sa Talisay City kay wala magsul-ob og helmet.

Haskang katawaa sa usa ka repairman. Matod niya: “Oo, usa ko adto sa nadakpan, Sir!”

Dayon, mihangyo sila, mag-selfie ming tulo gamit ilang selpon.

Haskang lingawa nila. Matud nila, didto pa sila makasugat og kliyente nga bisag dugay nagpaabot sa serbisyo sa PLDT, cool gihapon.

Di pareha sa uban nga kusog kunong mangasaba.  Mao ba, Bay?

Na hala, tabangi mig hangyo sa inyong top management, bi! Papaspasi na intawon inyong serbisyo.