Gustong magpakasal og lain samtang nag exist pa ang previous marriage

Dear Atty. Divine;

Ang akong boyfriend usa ka OFW, duna na siyay pamilya sa ilang probinsya but dugay na silang nagbuwag sa iyang asawa. Ang iyang mga anak naa sab sa iyang kanhi asawa ug iya kining gisuportahan. Gusto unta namo nga magminyo this year. But usa sa mga requirements kun magpakasal mi mao ang Cenomar ug sa dihang nagkuha siya og Cenomar mi-appear gyud ang iyang first marriage. Ang akong pangutana kun unsa may angayan namo nga buhaton aron mi makapakasal? Pwede ba nga mo-execute lang mi og Affidavit  of Cohabitation? Daghang salamat.

Gina

* * *

Dear Gina,

Dili gyud mo mamahimong makapakasal  samtang dili pa ma-annul ang iyang first marriage. Bisan pa kun mo execute mo og Affidavit of Cohabitation aron ma-exempt mo sa pagkuha og Marriage License mamahimo gihapong void ang inyong marriage tungod kay makonsiderar kining Bigamous tungod kay gipahigayon kini samtang nag-exist pa ang previous marriage. Mamahimo sab ikaw nga maapil sa pagpasaka og kasong Bigamy tungod sa imong pagpakasal kaniya bisan kun nasayud ka nga minyo na siya ug wa pa ma-annul ang iyang marriage. Busa ang maayong buhaton sa imong boyfriend mao ang pagpa-annul una sa iyang previous marriage una siya mosud og laing kaminyuon kay mapagan gyud ka sa iyang problema kun dili mo mosubay sa legal nga paagi. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.