Di ikapasigarbo ang pagpanaktak
Ang pangangkon ni Presidente Rodrigo Duterte og kalamposan sa iyang kampanya batok sa pangurakot tungod sa kadaghan na sa mga opisyal nga iyang gitaktak sa katungdanan way kalainan sa panghambog sa security guard nga daghan siyang nadakpan nga mga kawatan pila ka adlaw human sila nanglungkab sa building nga iyang gibantayan.
Ang wa isulti sa guwardiya, nga nahadlok mi nga di sab nato madunggan gikan sa presidente nga nagsaulog sa pagkahingpit sa unang tunga sa iyang termino, mao nga di unta makasalida ang mga kawatan kon wa pa siya magduka sa katungdanan.
* * *
Mas dako ang atraso sa presidente kay sa guwardiya nga nagmika. Gawas nga wa kahimo sa angay unta niyang himuon, gibuhat pa gyod sa presidente ang di angay nga buhaton.
Kay siya ra man sab ang nagtudlo sa mga opisyal nga iyang gitaktak.
Sa ato pa, di unta makapanghilabot ang mga opisyal sa nasudnong panudlanan, di unta makapangawkaw sa mga buhis nga gikan sa singot ug pagtukaw ug kakugi ug paningkamot sa kinabag-an sa katawhan, kon wa pa niya sila itudlo sa labing mahinungdanon nga katungdanan sa iyang pamunoan.
* * *
Nakapalang-og sa kasaypanan sa presidente mao nga nahibawo siyang daan nga mao ni dangatan sa iyang mga tinudlo. Wa niya itago nga natudlo sila tungod sa pagka-destino sa Davao, pagsilbi niya sa mayor pa sa Davao City, panag-uban nila sa abogasiya sa San Beda, pagtabang sa iyang kampanya ug pagka-suod sa iyang pamilya.
Nataligam-an ang mga tawo nga takos ug ligdong apan demalas nga wa kataak og Davao.
* * *
Way presidente nga makaato pagbantay sa tanan niyang tinudlo. Kasaligang mga tinubdan nagbutyag nga si Presidente Duterte, tungod sa pangedaron, mga sakit ug pagtutok sa pipila lang ka aspeto sa iyang pamunoan, gilipat-lipat lang sa iyang mga tinudlo, apil na sa iyang mga sinaligan.
Maong mahinungdanon ang pagmatngon sa pagtudlo.
Apan kon naabtan og tulo ka tuig una nakamatngon nga pagarpar ray nag-ayo ni Agriculture Secretary Manny Pinol, gawas nga way napasakang kaso ni napresentar nga ebidensiya batok sa mga tinudlo nga iyang gipasanginlang mga kawatan, ug ang mga gipasanginlan og seryusong kahiwian igo lang gibalhin-balhin og katungdanan, inay mopasigarbo angay siyang mangayo og pasaylo.
* * *
- Latest
