Pinoy wagi sa 3rd telco
SALAMAT at mayroon na palang third telco player sa bansa gaya nang pangako ni President Duterte. Ito ang Mindanao Islamic Telephone Company, Inc. (Mislatel) na balita ko’y dumaan sa butas ng karayom bago manalo sa bidding at makakuha ng prankisa mula sa Kongreso. Ito ang pinakaaabangan ng bawat Pilipino. Natanggap na ng Mislatel ang Certificate of Public Convenience and Necessity (CPCN) kaya puwede na nilang simulan ang kanilang serbisyo sa publiko.
Ginanap sa Malacañang kamakailan ang awarding ceremony na pinangunahan ni President Duterte kasama sina Department of Information and Communications Technology (DICT) Secretary Gringo Honasan at National Telecommunications Commission (NTC) Commissioner Gamaliel Cordoba.
Sabi nga ni Cordoba, panalo ang mga Pilipino sa pagkakaroon ng ikatlong player sa telekomunikasyon. Aniya “President Duterte’s third telco initiative coupled with the implementation of the mandatory unlocking of phones, the mobile number portability act, the implementation of the Common Tower Policy, the removal of text and call interconnection charges, and the implementation of the National Broadband Plan will greatly benefit the Filipino consumers.”
Kabilang sa mga commitment ng Mislatel ang 37.03% national coverage na may average speed na 27 Mbps sa unang taon ng kanilang operasyon. Sa panglimang taon, mapagseserbisyuhan na nila ang 84.01% ng populasyon at magiging 55 Mbps na ang average speed.
Para maging patas sa pagpili ng third telco player at hindi malulugi ang mga Pilipino, nagsagawa ang NTC sa apat na public hearings at 46 technical working group meetings simula Enero 2018. Setyembre ng parehong taon nang ilabas ng komisyon ang “Rules and Regulations on the Selection Process for a New Major Player in the Philippine Telecommunications Market.”
Mismong ang Presidente ang nagbuo ng Oversight Committee (OC) at itinalagang chairman ang noo’y DICT acting secretary na si Eliseo M. Rio at vice chairman si Finance Secretary Carlos G. Dominguez habang OC members naman sina Executive Secretary Salvador Medialdea at National Security Adviser Hermogenes Esperon.
Ang third telco player ay isa sa mga campaign promises ni Duterte. Kaya nang maging Presidente, agad niyang iniutos ang paghahanap ng isa pang telco player na pinaniniwalaan niyang magpapasigla ng kompetisyon at siguradong magbebenepisyo ang mamamayan pagdating sa mga serbisyong pangtelekomunikasyon.
Bago ang pagpasok ng Mislatel, pinangunahan ng NTC ang pagsusulong ng isang batas ukol sa mobile number portability. Sa ilalim ng Republic Act 11202 o ang “Mobile Number Portability Act,” tinitiyak na panghabambuhay na ang mobile phone number ng isang subscriber kahit magpalit pa siya ng network o mag-postpaid mula prepaid o vice versa at wala itong bayad.
- Latest
