EDITORYAL - Inayawan Landfill

Ang sunod nga bag-ong mga opisyales sa Konseho sa Dakbayan sa Sugbo na maoy modesisyon unya sa dangatan Safe Closure and Rehabilitation Plan (SCRP) sa Inayawan Sanitary Landfill sumala pa sa report.

Kini human nga wala aprubahi sa mga outgoing city councilors ang gisugyot ni konsehal Jerry Guardo nga paabrubahan ang SCRP sa landfill sa kataposan nilang sesyon niadtong Hunyo 25.

Karong bag-o naman ang konseho sa siyudad, angayan nga unahon kini pagaprubar aron masugdan dayon. Dili na unta kini malangay pa.

Simple ra kaayo, kinahanglan lang nga aprubahan kini ini og duso pagbalik ni Guardo kun makalingkod na siya pagka-konsehal karong gikanselar sa Comelec en Banc ang kandidatora ni konsehal Alvin Arcilla.

Sa pagaprubar unya niini, malikay ang siyudad sa kaso tungod kay apil kini sa kamandoan sa korte ngadto sa siyudad pinaagi sa Writ of Kalikasan nga kaniadto gipasaka ni konsehal Joel Garganera.

Gawas nga pagsunod kini kamandoan sa korte, makatabang sab kini sa pagwagtang na sa alisbo sa nanimahong basura nga giagwanta lang sa mga tawong nagpuyo duol sa lugar.

Dili na unta kini langaylangayon ug apilan pa og politika tungod kay nakita naman nga duna kini negatibong epekto sa palibot ug labaw sa tanan makaguba sa kinaiyahan.

Mas labing maayong buhaton sa lugar, himuon kining eco-park inay nga ibaligya alang sa komersyo. Patamnan nalang ang palibot o g daghang mga kahoy aron masuroyan sa mga tawo.

Pinaagi niini, makalimtan ug malubong sa hunahuna sa mga tawo ang kaniadto lugar nga nabantog sa kabaho ug kahugaw kay mamahimo naman kining usa na ka dapit diin makahanggab og limpyo ug preskong hangin ang tanan.

Kun mabuhat kini sa kasamtangang bag-ong mga konsehal sa siyudad magbilin kini og maayo ug positibong marka sa ilang panerbisyo ug mahimo pa ganing legasiya pagprotektar sa kinaiyahan.