EDITORYAL - Impeachment? Usik lang sa panahon

May mga nigawas nga mga balitang mamahimong ma-impeach sa pwesto si Presidente Duterte tungod sa iyang bugnaw kaayong pagtagad sa mga panghitabo karon sa West Philippine Sea ug ning uwahi ang insidente sa mga mananagat nga gidasmagan ug gibiyaan sa mga Chinese nga mananagat didto sa Recto Bank.

Ang pag-impeach sa presidente mahimong himuon kun kini ni-traydor sa nasud, nidawat og suhol, high crimes ug kahiwian nga nakapawala sa pagsalig kaniya sa katawhan.

Usa sa mga gipasangil kang Duterte ang pamahayag niya nga di mapugngan ang mga Chinese nga makapangisda sa sud sa exclusive economic zone (EEZ) sa Pilipinas kay amigo ang China.

Si kanhi DFA secretary Albert del Rosario mihulagway nga napakyas si Duterte pagpanalipod sa teritoryo sa Pilipinas ug mahimo siyang ma-impeach tungod niini.

Wala man moingon si del Rosario nga ipa-impeach si Duterte apan tataw kini nga pasidaan ngadto sa pangulo sa iyang mga aksyon sa isyu.

Samtang tuod maayong madungog kun may sukaranan kining mga reklamo ug mga kabalaka sa katawhan bahin sa tinagdan ni Duterte sa isyu sa mga Chinese, dili makaayo sa nasud kun may mosuway pagpalagpot kaniya.

Masamok ang nasud ug makutaw na sab ang katawhan ug magkabahin-bahin. Gawas pa niana, ang sunod nga kongreso karon gidominar sa mga kaalyado ni Duterte ug lisod makalusot ang bisan unsang reklamo batok kaniya.

Sa laktod nga pagka-estorya, pagusik-usik lang kini sa panahon ug mahimong kataw-anan kay maghitsura unyang pamolitika ang tanan.

Labaw sa tanan, nibahad na si Duterte sa mga nagplano palang pagpa-impeach kaniya nga iyaha silang ipapriso kun mosuway sila paghikay sa kaso.

Ngil-ad man paminawon apan siya man ang presidente, mahimo niyang ipagawas nga buhaton niya kini aron maprotektahan ang nasud gikan sa mga gustong guboton kini.

Posibleng pareho ang tumong sa mga kritiko ug ni Duterte nga protektahan ang soberiniya, teritoryo ug interes sa Pilipinas diha sa WPS, apan managlahi sila og pamaagi kun unsaon paghimo niini.