Modelo sa China

Makapanlimbawot sa balhibo ug sa sama’ng higayon makadasig giunsa sa China pagkab-ot ang pagsulbong sa ilang ekonomiya. Sukad gihangop sa maong komunistang nasud ang pagpakiglambigit sa ubang kanasuran sa kalibutan sa natad sa patigayon ug foreign relations niadtong 1980, misulbong ang ilang ekonomiya. Basi sa ilang modelo, samtang nakatabang ang pag-usab sa ilang polisiya, mas dako og natampo ang paglatag sa mas klaro nga mapa sa direksiyon nga buot nilang makab-ot.

Ang mga lider sa Communist Party of China nga maoy nagpadagan sa ilang gobiyerno, dunay klarong time table nga gisubay kanus-a nila makab-ot ang ilang tumong.

Pananglitan, usa sa ilang programa mao ang hingpit nga pagpapas sa kawad-on sa tuig 2020. Ilang tumong nga sa sunod tuig wala nay kabus sa ilang nasud nga magpuyo ubos sa poverty threshold sa World Bank nga US$1.9 nga income matag-adlaw.

Matud sa usa mga opisyal sa ilang ahensiya nga gitahasan sa pagpatuman sa maong programa, hapit na nila makab-ot ang maong kalampusan. Duha ka butang ang ilang gihimo aron makab-ot ang maong plano— infrastructure ug loan facility.

Gipatuman sa ilang gobiyerno ang massive infrastructure projects aron maabot sa transportasyon ang tanang hilit nga dapit ug gidasig ang mga kompaniya nga mobubo og puhonan aron paghatag og trabaho sa ilang mga molupyo.

Gihatagan sa gobiyerno og pohunan ang buot magnegosyo pinaagi sa pagpahuwam og kwarta nga way interest.

Gawas niini, usa sa dakong hinungdan sa mahulagway nga economic miracle nga nakab-ot sa China mao ang continuity sa ilang mga programa.

Tungod kay usa lang ka partido ang nagpadagan nga mao ang CPC way politika nga makababag sa mga programa.

Sukwahi sa atong sistema, way mga politiko nga magpunay og babag sa mga maayong programa.

Sigurado sab nga ang ilang mga proyekto mahuman gyud ug dili mausik tungod kay dili mapadayon gumikan sa politika.

Usa sa labing makaibog sa China mao ang ilang transportation system.  Bisan sa kadaghan sa ilang population nga moabot na og 1.3 bilyones, ang ilang dagkong syudad sama sa Beijing nagpabiling luag ang trapiko.

Kini tungod sa labihan nila ka epektibo nga mass transport system. Duna silay subway train ug Bus Rapid Transit. Ang ilang train station hapit kada minuto dunay mohunong nga train. Labihan sab kabarato sa ilang pletihan gawas lang sa taxi.

Kun mapatuman sa atong gobyerno bisan ang mass transport system lang una nga mamahimo epektibo, garantisado nga molambo ang ekonomiya dungan sa paglambo sa productivity sa atong labor force.