Defining moment

Dugay kong nakatulog ug gani nahimong daw haw-ang ang akong hunahuna ingon man ang pagbati kini tungod kay dunay nihasol kanako. Hapit na gyud ang petsa 14 ning buwana. Tingali kun matagik na kining maong pamalandong sa akong lindog ako na pud madawat ang laing appointment letter. Nagkahulogan kini og laing hugna ug laing anib sa akong panaw sa kinabuhi. Bag-ong matang sa kasinatian ingon man ang paggambalay og mga bag-ong damgo o mga damgo nga padayon gihapong gipangindahay nga pandayon. Gibati ko ang kabalaka kini tungod kay diha sa pag-angkon sa akong kahuyangan ug kakuwangan nahimo ba kahang husto o hingpit ang akong paningkamot?

Apan sa laing bahin nakita ko ang kamot sa Dios nga wa gihapon magpasagad kanako bisan pa man sa mga higayon nga ako nagbagulbol ug nagdumili sap alas-anon nga iyang gisangon kanako. Kini tungod kay akong nakita ang akong kaugalingon nga maoy sukaranan sa tanan kong paningkamot sa Dios ako nahikalimot. Mao tingali nga matag kaadlawon ako Iyang Pukawon aron bisan pa man sa tanang kalisdanan ako sa gihapon magpasalamat. Daghan ko og nakat-onan sa akong pagtaak sa dalan nga gilatid alang kanako. Kini naglangkob ning mosunod:

1. Diha sa kalisud mahimong mogana ang imong pagkamamugnaon.

2. Diha sa kakabus mobubo sa panalangin ang Dios. Ug kay siya mopuno man unta maantigo kitang mohatag bisan pa man sa atong kakulangan.

3. Ayaw pagkwenta sa imong nabuhat. Ang Dios nakakita sa imong kahago ug wala kay angay pang ipamatuod kaniya.

4. Pasalamat sa mga tawo nga bisan pa man sa mga higayon nga sila magdumili paghatag sa ilang pag-uyon apan nahimo silang kabahin sa imong kinabuhi. Gani ikaw usab nahimo man pud nga ilang kinabuhi.

5. Ang tanan dunay utlanan. Matag sinugdanan angayang mahuman aron sa ingon matagik ang laing sumpay sa panaw sa kinabuhi.

6. Ang tanan mamahimong kabahin na lamang sa imong handumanan nga imong pagabawonon bisan asa ka pa padulong. Mga handumanan nga magsilbing inspirasyon sa mga higayon nga mohasmag ang laing dagway sa kapakyasan.

7. Ang pahiyom ayaw wad-a kay basin na lamang pinaagi niini ang mga tawo nga dunay laraw mohunong pagginhawa ang makakita sa gihapon sa kahulogan sa kinabuhi.

Kun kaniadto nga gibati ko ang tumang kahadlok ug kahuyang sa pagtuo sa Diosnong pag-amoma karon akong gihatag ang tanan sa way igong pagdumili. Wala nay lain pang ipamatuod. Ang mahinungdanon mao nga mahatag ang Gugma nga kanako gihatag pud sa Dios. Dios lang paigo na! Samtang akong gihinay hinay og pupho ang akong mga kasinatian ug nagpasalamat ko niini ug sa mga kahigayonan nga gihatag kanako sa kahitas-an. To all that has been thank you! And all that will be Yes! Binalhinay Na! Karong buwana mao na ang Defining Moment!