EDITORYAL - Dako’g salig kang Trump

Dunay nigawas nga survey sa Pew Research Center nga nagpakitang usa ang Pilipinas sa 25 ka mga nasud nga taas og pagsalig kanila ni US President Donald Trump ug Chinese President Xi Jinping.

Sa Spring 2018 Global Attitudes Survey nakita sa Pew  nga 50% sa mga Filipino nga ilang napangutana giingong  dunay pagsalig sa duha ka mga lider, apan kun bahinon, 24% ang dunay pagsalig kang Trump ug  7%  lang ang kang Xi, samtang 9% sa mga napangutana walay salig sa duha.

Kauban sa Pilipinas nga taas og kompiyansa sa duha ka lider ang mga nasud sa Nigeria (38%) ug Kenya (36%). Masaligon sila nga ang duha ka lider maayo og mahimo sa kalibotan.

Apil sa mga nasud nga gi-survey ang Israelis, Tunisians nga managlahi og gusto. Ang natural nga mas mosalig kang Trump mao ang Israelis samtang kang Xi sab ang Tunisians.

Apan mas daghan sa mga napangutana sa survey gikan sa mga nasud sa Spain, France, Brazil, Greece, Mexico, Germany, Sweden, Japan, Italy, Netherlands, Argentina, Hungary, Canada, United Kingdom, South Korea ug Australia ang kuwang og kompiyansa sa duha ka lider.

Ang maong survey dinhi sa Pilipinas gihimo niadtong May 28 hangtud July 7, 2018 nga gitagsatagsa gyud pagpangutana ang 1,181 ka mga hamtong nga mga Pilipino. Duna kini margin error of 4.2 percentage points.

Makita sa surveys nga ang Pilipinas sama sa Kenya ug Nigeria nasakop sa mga ‘developing countries’ o gitawag kaniadtong third world countries.

Samtang kadtong mga adunahang mga nasud nga kaalyado pa gani sa US nagpakita nga sila mismo may pagduhaduha kang Trump ug labaw na kang Xi kinsa bisan dili angkunon sa ilang mga lider di gyud sila gusto og komunista.

Ang ingon niini nga matang sa mga surveys bisan og dili gyud tibuok populasyon ang napangutana maghatag na og ideya kun kang kinsa mas mosalig ang kadaghanan ug makaimpluwensya kini.