Likoy

Hinaut may hustisya gyud nga makab-ot ang linoog nga pagpatay sa 16-anyos nga si Christine Lee Silawan.

Kini human milikoy ang nangangkon nga naghimo sa krimin atol sa arraignment sa iyang kaso niadtong Huwebes.

Si Renato Llenes nga unang miangkong maoy nagpatay ni Silawan ug mipanit sa nawong niini, mi plead not guilty sa kasong murder.

Dihang gibasahan sa iyang kaso niadtong Huwebes didto sa Regional Trial Court sa Lapu-Lapu wala na angkuna sa sinumbong ang iyang gibuhat.

Ang abogado hinuon ni Llenes miingon nga dili bakwion sa iyang kleyente ang extra-judicial confession nga iyang gipirmahan.

Buot lang kuno ni Llenes nga ang mas ubos nga kaso maoy isang-at batok niya. Inay murder buot ni Llenes nga homicide maoy iyang atubangon.

Matud sa abogado nga mo-plead guilty si Llenes sa kasong homicide.

Salamat nga miinsister ang piskaliya nga murder maoy isang-at ug dili homicide sigun sa gusto sa sinumbong.

Matud sa prosecutor nga kun gustong moangkon ni Llenes sa krimen iyang atubangon ang mas bug-at nga kaso.

Human sa arraignment nagpasabot ni nga mosugod na   og presentar sa ilang mga ebidensiya ang prosecution.

Hinaut lig-on ug hitsas sa mga ebidensiya nga magamit ang piskaliya aron pamatud-an ang kasong ilang gisang-at.

Dili mahimo nga ang nangangkong responsable sa usa ka linoog nga krimin maoy magbuot unsay kaso nga iyang atubangon.

Katungod sa abogado sa akusado nga protehian ang interest sa iyang kliyente, apan angayang gipasabot niyang daan sa sinumbong ang mamahimong lintunganay sa iyang pag-angkon sa krimin.

Awahi na nga mangayo og kondisyon sa iyang pag-angkon tungod kay anaa na sa hukmanan ang kaso.