Mga seniors nangalipay

Madugangan na usab ang gidaghanon sa mga senior citizens nga makadawat og cash assistance gikan sa kagamhanan sa dakbayan sa Sugbo kay giaprobahan man sa City Council nga apilon na paghatag kadtong narehistro ug nakabotar sa eleksyon niadtong 2013.

Sa ato pa, kada tuig subra na sa P1 Billion ang budget nga itagana sa dakbayan para lang sa paghatag og tag P12 mil nga cash assistance.

Karon lang gani nga 75,028 ka senior citizens ang beneficiaries, ang budget sa usa ka tuig kapin na sa P900 milyones.

Kon mapun-an kini sa mga senior citizens nga nakabotar niadtong 2013, sigurado ko nga ang kantidad mosubra na sa usa ka bilyon ka pesos.

Apan maayo na lang sab ni sa mga senior citizens nga makadawat sila og tabang gikan sa kagamhanan sa siyudad.

Saludo ko ni Konsehal Eugenio Gabuya Jr. nga maoy naghimo og sugyot nga apilon na ang mga nakabotar sa 2013 nga hatagan. Maayo man gani nga apilon na lang sab kadtong nakabotar sa 2016 kay gisaad baya ni nila sa kampanya.

* * *

Kon tinuod man ang akong nadunggan, mga bag-ong ngalan gyud diay ang mga ipanudlo ni mayor-elect Edgardo Labella sa mga sensitibo nga katungdanan sa kagamhanan sa siyudad sa Sugbo.

Maayo man sab kay kinahanglang ang mga itudlo ni Labella ang iya gyud nga mga gisaligan. Bisan si vice mayor-elect Mike Rama miingon nga dili gyud siya morekomendar sa iyang mga kanhi sinaligan alang sa mga sensitibong katungdanan sa City Hall kay dili niya but-an si Labella.

Pastilan, nakadungog ra ba ko nga may opisyal kaniadto sa termino ni Rama nga pagkadaog ni Labella, nisuroy dayon didto sa departamento nga iyang gidumala ug nagpadungog-dungog nga makabalik na siya.

May nahibaw-an na kami sa mga giingong itudlo ni Labella, apan kinahanglan nga ang pahibalo gikan gyud sa mayor.

Ang ako lang nga unta ang itudlo ni Labella sa mga sensitibong pwesto kadto gyud nga mga dunay tinguha nga moserbisyo pagpalambo sa siyudad, ug dili kay ang tuyo mao ra ang pagdawat og sweldo.

* * *

Inigbanos gyud ni Labella sa pagdumala sa siyudad, kinahanglang mopakita gyud dayon siya og kausaban. Wala malilong kang Labella ang mga bagotbot sa mga pedestrians nga naglisud na pag-agi sa aseras tungod sa mga sidewalk vendors nga miabuso na pag-ayo.

Kinahanglan nga atol sa termino ni Labella, masulbad na ang problema nga bisan hinay ra ang uwan, maglunop na dayon sa Colon ug ubang mga karsada sa downtown area.

Kon makakita og kausaban ang katawhan, hilom sila nga modayeg sa bag-ong mayor.