EDITORYAL - Wa man lagi giraha?

Nisunod karon ang Indonesia ug ang Vietnam sa gihimo sa Pilipinas sa panahon sa administrasyon ni kanhi presidente Benigno “Noynoy” Aquino pagpangalan sa teritoryong giangkon sa Pilipinas nga West Philippine Sea.  Ang maong duha ka silingang nasud sa Pilipinas, naghimo og kaugalingong pangalan sa mga teritoryong ilang giangkon diha sa South China Sea.

Sama sa pagdeklarar sa Pilipinas nga West Philippine Sea ang kadagatan sa kasadpang bahin niini.

Ang Indonesia bag-ohay lang gipangalanan ang North Natuna Sea nga diin nag-abot ang utlanan sa SCS nga gisugdan na sab og kamang sa China nga ilahon. Samtang ang Vietnam gipangalanan ang kadagatan nga ilang giangkon sa SCS nga East Sea.

Ang gibuhat sa duha usa ka pagtulon-an nga wala masulod sa hunahuna ni Presidente Rodrigo Duterte. Si Duterte nagsige og estorya nga dili kini gustong girahon sa China.

Kun tinuod pa ang kabalaka ni Duterte, kining gibuhat sa Indonesia ug sa Vietnam miresulta na unta sa pagsulong kanila sa China.

Ang ilang aksyon direktang hagit sa doktrinang gisunod ni Duterte sa South China Sea matud pa ni Panos Mourdoukoutas sa lindog niini sa Forbes.com. Si Mourdoukoutas Professor  ug Chairman sa Department of Economics sa LIU Post sa New York

Ang Vietnam mideklarar usab nga supak sa ilang balaod ang gipanghimo sa China diha sa SCS apil na ang paghimo og artipisyal nga mga isla, pagbutang og mga imprastraktura ug ang paghimo niini base militar.

Karon nga nagbukal ang kainit sa trade war sa US ug China, dili kaayo makatutok ang China sa mga silingang nasud.

Matud pa ni Mourdoukoutas ang financial markets gani sa rehiyon wala matarog bisan sa gibuhat sa Indonesia ug Vietnam kay nakatutok ang China sa trade war niini sa US.

Busa, maayo kining panahona para molihok ang Pilipinas diha sa West Philippine Sea sama sa pagpadali sa pag-repair sa mga pasilidad sa Pagasa Islands ug uban pang mga isla nga giokupar karon.