Waldas sa kabtangan sa probinsiya sa Sugbo

Bangkaruti na ba ang panudlanan sa probinsiya sa Sugbo nga nalukop naman ang Kapitolyo og pamaligya sa ilang kabtangan?

Human sa makasaysayanong Cebu International Convention Center nga gibaligya lang og P300 million ngadto sa dakbayan sa Mandaue inay nga ipaayo human makaangkon og kadaot tungod sa linog ug bagyo, karon ang mga lote nasab sa probinsiya maoy gipamaligya ni Gobernador Hilario Davide III.

Niadtong miaging buwan gimantala sa probinsiya ang ilang imbitasyon sa mga buot mosalmot sa public bidding nga himoon sa Kapitolyo.

Tinguha niini nga ibaligya ang 14 ka mga luna nga gipanag-iya sa lalawigan.

Kini naglakip sa 3,203-square meter nga luna diha sa New Era, Barangay Mabolo, Cebu City; 63-square meter sa Nivel Hills, Barangay Busay; 11 ka lote sulod sa Maria Luisa Subdivision nga dunay kinatibuk-ang gidak-on nga 11,246-square meter; ug 1,104-square meter diha sa Barangay Kamputhaw.

Ang kayutaan nga gipanag-iya sa Kapitolyo maoy usa sa mga hinungdan nganong ang probinsiya sa Sugbo nalakip sa mga labing dato nga lalawigan sa nasud. Nahimong instrumento pagtigom sa bahandi sa probinsiya kaniadto mao sila si kanhi gobernador Pablo Garcia ug ang iyang anak nga si Gwendolyn Garcia.

Atol sa ilang termino gihingosgan ang pagbawi sa mga luna sa probinsiya nga gidonar sa nangagi nga mga administrasyon apan wala na magamit sa orihinal niini nga katuyoan.

Usa sa gitinguha niadto nga bawion sa Kapitolyo mao ang kabahin sa Camp Lapu-Lapu sa Armed Forces of the Philippines-Central Command. 

Apan karon gipamaligya na hinuon ni Davide ang mga yuta sa Kapitolyo. Unsay iyang tumong? Asa gamiton ang kwarta? Plano ba niyang hutdon ang bahandi sa Kapitolyo sa dili pa mokanaog isip gobernador karong Hunyo 30?

Wala ba siya matagbaw nga magbilin og P1.5 billion nga utang sa Development Bank of the Philippines (DBP) nga hangtud ang mga yuta sa probinsiya gusto man niyang ipamaligya?

Ang administrasyon ni Davide nangutang og dakong kantidad gikan sa DBP aron igasto sa katukoran sa Capitol Resource Center nga gitawag sa iyang mga kaatbang nga “Torre ni Davide.”

 Isip gobernador sa Sugbo responsibilidad unta ni Davide ang pagpalambo sa mga kabtangan sa lalawigan aron dunay magamit paghatud sa batakang serbisyo.

Tinuod lain-lain og prioridad ang matag-administrasyon apan tingali ang usa ka maayong lider di mamaligya sa mga kabtangan nga dili siya maoy nanag-iya.

Sama sa usa ka maayong haligi sa pamilya, angayang ampingan ni Davide ang katigayonan nga gisalig sa publiko kaniya inay nga iyang iwaldas.