Padayong pagtak-om sa CBCP
Gibutyag na sa publiko ang listahan sa kaliboan ka pari sa Simbahang Katoliko, apil na ang mga kardinal ug mga obispo, nga napamatud-an nga nangabuso sa mga bata ug kababayen-an sa ilang mga parokya sa nagkalainlaing kanasuran sa kalibotan. Labing uwahi nga nimantala gahapon sa lista sa 115 ka pari ug lima ka diyakuno sa ilang website mao ang Artsidyosesis sa New York sa Estados Unidos.
Kansang pangu, Arsobispo Timothy Cardinal Dolan, nga nakaduaw sa Sugbo aron pagpaambit og katekesis sa ika-51 nga International Eucharistic Congress (IEC) niadtong 2016, subling nangayo og pasaylo.
* * *
Kabahin ni sa pagmatuod sa kadagkoan sa simbahan nga di sila kutob ra sa sulti sa panumpa nga badlungon na ang mga pangabusong seksuwal sa kaparian, susihon ang tanang pasangil, silotan ang mga mapamatud-an nga sad-an ug hatagan og hustisya ang mga biktima.
Gawas sa pagpatawag sa Vatican og kalibotanong tigom sa mga obispo aron pagtuki sa eskandalo, sunudsunod nga nasilotan ang mga kardinal nga napamatud-ang nangabuso o nitabon sa pangabuso, apil nang usa sa labing sinaligan ni Pope Francis sa iyang kampanya paglimpiyo sa Vatican Bank.
* * *
Makapahibung nganong wa pay lista nga gipagawas ang Catholic Bishops Conference of the Philippines (CBCP) atubangan sa sibaw nga mga pasangil sa pangabuso batok sa kaparian sa Pilipinas apil na dinhi sa Sugbo.
Di makapasangil ang CBCP nga nagpakahilom ang mga biktima. Kay may pipila na nga nitiyabaw nga bisan kapila na sila magbalikbalik og pakitabang sa mga obispo wa matandog ang mga pari nga ilang gireklamohan, gawas nga nagpabilin sa mga parokya nakabiktima pa gyod og dugang.
* * *
Bugtong nahibaw-an sa mga Sugbuanon nga nahukasan sa sotana mao si Msgr. Cristobal Garcia. Kansang kaso dugay nang nasang-at sa Vatican ug nahibaw-an nga giduphan siya dinhi dihang nanghambog sa kalibotanong pamantalaan nga sayon rang pagpayuhot og ivory sa Estados Unidos.
Hinaot nga mohunong nang CBCP sa sayop nilang pagtuo nga kublan ang nangabuso natong kaparian gikan sa kalibotanong pagpanilhig. Hinaot nga di maguwat og kilat una manguros. Kay kun nadutlan ang mga nag-alirong ni Pope Francis, moabot rang adlaw sa panudya sa atong tugkaran batok sa mga nangabuso ug sa mga nitabon sa pangabuso.
- Latest
