‘Di-mapigilang pagtaas ng presyo ng mga bilihin
NAKALULUNGKOT ang report ng World Health Organization (WHO) na hindi kayang pigilan ang pagtaas ng presyo ng gamot sa buong mundo. Malaking epekto rito sa ating bansa dahil hindi rin mapigilan ang patuloy na pag-usbong ng mga nagkakasakit. Meron akong mga kakilala na nagmi-maintenance na ng gamot at hirap na rin silang bumili dahil sa kapos sa pera. Ang sakit ay walang pinipiling tao kapag kulang tayo ng pag-aalaga sa sarili ay asahan na magkakasakit.
Sunud-sunod na dagok ang nararanasan natin dahil sumunod din sa pagtaas ang gasolina at mga bayarin sa kuryente at tubig. Asahan na natin na kapag ang gasolina ang tumaas pati pagkain ay tataas din. Kunsabagay, ang langis natin ay galing sa ibang bansa kaya hindi permanente ang presyo. Kung sana may sarili tayong pinagkukunan ay hindi sana natin daranasin ang ganitong sitwasyon. Para sa akin nakasalalay sa ating sarili kung paano tayo makakatipid halimbawa sa gasolina iwasan nalang natin ang malayong biyahe, ang perang matitipid sa gas ay puwedeng pantapal sa ibang pangangailangan sa tahanan.
Ang nasapol dito sa sitwasyon natin ay ang kababayan nating mahihirap. Bakit kanyo? Siyempre sa katiting na kita ay walang maitatabing pera. Kahit ang mga magsasaka ay kalbaryo rin dahil tuyot ang kanilang mga pananim, nasa kalagitnaan pa lamang tayo ng tag-init.
Ang tamang paraan ngayon ay ingatan ang ating sarili upang ‘di magkasakit. Lalo na ngayong uso ang heat stroke kung saan nakamamatay ang sakit. May mga programa nga ang gobyerno tulad ng universal health at Philhealth pero may mga gamot tayong dapat bilhin at hindi naman lahat ng konsumo ay libre sa ospital. Kaya sa ating mga kamay nakasalalay ang kaligtasan ng sarili.
- Latest