Paghinulsol ug tuo sa Ebanghelyo

Kini ang usa sa mga options kun himuon ang pagbadlis sa abo sa agtang sa matag tawo nga mosimba. Ang tawo ingon nga tawo dunay dakong kahigayonan nga masayop kini tungod kay dunay uban nga dili hamtong sa paggamit sa ilang kagawasan.

Ang matag usa nato dunay kagawasan apan ang bugtong paagi gyud unta sa paggamit niini mao man ang paghimo og maayo ug dili ang dautan. Ang pag-angkon uban ang pagpaubos sa sala nga nahimo mao man ang sinugdanan sa kasantos.

Dili mamahimong makalihok ang grasya diha sa matag tawo kun ugaling diha sa kaugalingon anaa ang himsog nga garbo.

Kun maghisgot kita og himsog nga garbo nagpasabot kini nga atong gidawat ug giangkon uban ang pasalamat sa mga kaantigohan nga kanato gihatag.

Ang dili himsog nga garbo gigamit nato aron dili makita ang atong mga sayop ug kakulangan nga buot natong tabonan gikan sa mga masudyaong mga mata sa katilingban.

Ang paghinulsol wala makapaubos nato hinunoa nakapatuboy sa atong tinguha nga mamahimong matul-id human sa atong pagkabaliko.

Ang ebanghelyo nagpasabot og Maayong Balita. Human sa pag-angkon sa atong mga sala atong tuohan nga dunay maayo nga kamatuoran nga magdala kanato sa tunhay nga kaluwasan.

Kini nagpasabot nga nindot gihapon ang kalibutan ug kun ang matag usa mohatag lang sa ilang kaugalingon diha sa pagpasaylo aron pud pasayloon mamahimong makahuloganon ang paghinulsol labina kun ato kining giantosan ug gibakhoan.

Sa atong panahon karon nahimong masudyaon ang matag usa kanato nga tungod niini nahimong daw tinalawan ang pagbasol sanglit mahimong halayo man ang pasalig sa kalinaw ug kalipay.

Ning panahon sa kwaresma atong angkonon nga sama sa uban kita samaran usab apan bisan pa man sa atong pagkasamaran anaa ra gihapon ang panahon sa pagtang-on sa dugo sa atong kapakyasan.

Ug kun ikaw nakasinati sa pasaylo nan, imantala sa uban nga ang pasaylo dili diay hunahuna lamang kondili kahimtang nga nagasukad sa mahigugmaong pagbinayloay sa kaugalingon.