Iwas pusoy ang Hugpong sa debate?
ANG hindi ko maintindihan kung bakit hanggang ngayon ay wala pang maliwanag na sagot ang mga tumatakbong senador sa ilalim ng Hugpong Pagbabago na pinamumunuan ni Davao City Mayor Sara Duterte. Mas pinagkakaabalahan nila ang dumayo sa mga probinsiya at magpakilala sa tao ng pansariling pamamaraan. Kung totoo ang layunin n’yo sa bayan huwag atrasan ang hamong debate ninuman.
Ako’y humahanga sa mga kandidato ng Otso Diretso. Alam kong tagilid ang ibang miyembro sa karera pero pilit pa rin nilang ipinaparating sa mga tao ang kanilang magandang layuning maglingkod ng tapat sa tao. Ang iba kasing kumakandidato ay nadadala lang sa popularidad pero ampaw naman ang laman ng ulo. Meron pang siga-siga kunwari pagnanalo ay kayang ipagtanggol ang South China Sea. Sa tingin ko hindi ang mga kandidatong ‘yan ang kailangan natin kundi yung masasabing may utak at mga disente. Hindi puro yabang ang lumalabas sa bibig nila.
Para sa akin karuwagan ang tawag sa mga kandidatong ayaw sa debate. Para sa aming mga botante kailangan n’yong makipagtagisan ng kuro-kuro sa bawat isa saka kami mamimili ng aming iboboto kumbaga kaming mga botante ang inyong mga tatayong hurado. Kung tutuusin mas kailangan ng mga tumatakbo sa ilalim ng Hugpong dahil karamihan sa kanila ay dawit sa iba’t ibang anomalya. Ito na ang pagkakataong ipaliwanang sa taumbayan na hindi totoo ang mga akusasyon sa kanila.
Umaasa ako na sanay matutuloy ang inaasam nating lahat na debate ng mga kandidato upang sa gayon ay masuri nating mabuti ang mga iboboto. Dito nila ipakita ang kanilang mga angas sa pakikipagtalaktakan sa mga kapwa kandidato. Hindi puro kayabangan ang paiiralin at dito n’yo sabihin sa mga botante kung karapat-dapat ba kayong iluklok sa puwesto.
- Latest