Agrabyado
NANINDAK na nga. Ayon kay Presidential Spokesman Salvador Panelo, sinabihan daw siya ni Chinese Ambassador Zhao Jianhua sa isang kainan na kapag ipinabalik ng Pilipinas ang mga Chinese na iligal na nagtatrabaho sa Pilipinas nang basta-basta, gagawin din daw nila sa mga Pilipinong OFW sa China. Ayon kay President Duterte, may 300,000 OFWs sa China. Kaya nagpahayag na pabayaan na lang ang mga Chinese na magtrabaho rito, dahil baka bawian tayo ng China. Hindi ito tinanggap nang maraming sector, at nagpahayag pa ang Palasyo na haharap sa mga batas natin ang mga iligal na trabahador.
Kung lumalabag nga sa mga batas hinggil sa imigrasyon, kung iligal na nagtatrabaho sa Pilipinas, hindi ba tama lang na mahuli at ipabalik sa China? Ang sinasabi ba ng Presidente ay pabayaan na lang, kahit iligal? At ang 300,000 Pilipino na umano’y nasa China ay mga iligal din nagtatrabaho, o ligal sila? Kung magpabalik tayo ng mga iligal na trabahador ay babawi ang China sa mga ligal na trabahador?
Nagbabala nga si Neri Colmenares, dating mambabatas, sa umano’y kontrata na magpapabigat lamang sa bansa. Ang tinutukoy ay ang Chico River Pump Irrigation Project kung saan magpapahiram ng higit P3 bilyon ang banko sa China. Nakasaad din umano sa kontrata na kompanya mula China ang gagawa ng proyekto, na siguradong mga trabahador mula China ang kukunin. Ni hindi nga dumaan sa bidding kung sino ang gagawa, na bawal sa batas natin. May ilang kundisyon din umano sa kontrata na kailangang may porsiyento ng utang na kailangang mabayaran sa mataas na interes kumpara sa pautang ng ibang bansa tulad ng Japan.
Matagal nang nagbabala ang marami hinggil sa pautang ng China. Wala namang argumento na may benepisyo ang mga proyekto sa tao. Ang problema lang ay may kundisyon hinggil sa pagbayad na sa China. At malinaw na maaaring agrabyado ang bansa sa mga pautang na iyan. Hindi rin maganda ang paninindak ng China na babawian ang mga OFW kung sakaling ipabalik basta-basta ang mga iligal na trabahador mula China. Akala ko ba kaibigan na kaibigan na ang China? O kaibigan lang basta’t sila ang nakikinabang, sila lang ang lamang?
- Latest
