Katarong mopatigbabaw gihapon
Pagkadakong palpak ang nahimo sa opisyal sa kasundalohan ug kapolisan dihang gipakita nila dayon sa publiko ang video sa mga nahaunang suspek sa pagpamomba sa Mt. Carmel Cathedral.
Murag segurado na gyud kaayo sila nga mao na kadto ang mga responsable kinsa gilambigit pa nila sa grupong Ajang-Ajang usa ka local terorist group nga konektado sa Abu Sayyaf.
Apan nasayran nga inosente diay kadtong upat ka mga lalaki nga nakuhaan sa CCTV. Nipatim-aw ang naasoy’ng mga lalaki sa mga otoridad aron malimpyohan ang ilang ngalan.
Ang usa estudyante ug ang usa gikan ra diay kadto mipalit ug tambal dihang nahitabo ang church bombing.
Dili tiaw nga kahadlok nga gibati sa naasoy’ng mga batan-on kay sila na gud ang sentro sa operasyon ug sige pa gyud og gipakita sa mga balita ang ilang mga nawong.
Pastilan kun nahitabo pa nga naunhan sila sa pagpusil patay sa mga otoridad aw impas gyud unta ang ilang kinabuhi.
Dinhi nato makita ang dako nga kapalpakan sa imbestigasyon sa naasoy’ng pagpamomba.
Karon balik sa wala ang imbestigasyon sa mga otoridad kun si kinsa gyud ang mga demonyo nga mibomba sa simbahan nga nakapatay sa 20 ka tawo ug nakaangol sa mokapin 100 ka mga biktima.
Karon gidasonan na nila ang giingon ni Presidente Duterte nga suicide bomber ang responsable sa panghitabo sa Jolo.
Syempre mao man kini ang giingon sa ilang commander in Chief maong mao gyud kini ang masunod.
Apan para nako duda lang kon suicide bombing ang nahitabo tungod kay dili pa seguro ka ingon niana ka panatiko ang usa ka babaye o tawo nga mokutlo sa kinabuhi tungod lang sa iyang idolohiya.
Hinoon kun nahimo nila nga pamatyon ang mga inosenteng tawo aw mahimo usab nila ang pag-among sa ilang kinabuhi.
Unta dili na mokatap pa sa ubang dapit ang maong panghitabo ug mopatigbabaw ang kaaghop ug katarong nga maoy mobuntog sa kadautan.
- Latest