Palong ang signal

Siguradong daghan na usab unya ang mag-ugot niining plano sa kapolisan ug kagamhanan sa dakbayan sa Sugbo nga pagpalong na usab sa signal sa cell phone atol sa mga kalihokan sa Fiesta Señor ning siyudad.

Ang maong lakang gipatuman na sa pangilin sa fiesta niadtong niaging tuig. Ug buot sa otoridad nga isubli kini karong panahona isip kabahin sa pagpalig-on sa siguridad alang sa mga aktibidadis sa fiesta, ilabina sa Sinulog Festival.

Ang plano sa pagpatay sa signal sa cell phone panahon sa kasaulogan sa fiesta natigayon human usab sa travel advisory sa United Kingdom nga nag-warning sa mga citizen niini dinhi sa Pilipinas sa dili pag-travel ngadto sa pipila ka lungsod sa southern Cebu tungod sa hulga sa terorismo.

Hinuon, ang pagpalong sa signal sa cell phone dili ikalalis nga makaayo kini alang sa pagpatuman sa siguridad sa gatusan ka libong deboto ug bisita kinsa mosaksi sa mga kalihokan sa fiesta, ilabina sa Sinulog.

Niining maong lakang wala gyuy kumpiyansa ang otoridad.

Hinuon, dili gayud nato matag-an ang panahon. Wala kita mahibalo kun aduna unyay motangka pagsabwag og kaguliyang atol sa mga kalihokan sa piyesta.

Hinuon, sa kasaysayan sa piyesta niining dakbayan, hugot nga siguridad ang kanunay nga gipatuman sa otoridad. Kini ang hinungdan ngano nga dili gayud mosaler kadtong gusto nga mosabwag og kaguliyang.

Karong panahona, moderno na usab ang pagpanagang sa otoridad batok niadtong mosulay pagsamok sa kaulogan sa piyesta. Ug kini lakip na sa pagpalong sa signal sa cell phone sa mga lugar diin ipahigayon ang mga kalihokan.

Apan sa laing bahin, dili usab nato kalikayan nga daghan ang mangyam-id niining maong lakang sa kapolisan. Alang kanila, dako usab nga kahasol ang dala niining pagpalong sa signal sa cell phone atol sa kasulogan.

Kadtong adunay emergency dili na gayud basta nga makakontak aron pagpangayo og tabang. Alang niadtong mga vendor atol sa kasaulogan, dako kaayo ang gamit sa cell phone sa ilang ginagmay nga negosyo apan dili unya sila kagamit niini.

Kay lagi maniubra kini sa kapolisan ug kagamhanan sa dakbayan, walay mahimo kadtong wala makaayon sa maong plano. Igo na lamang silang magbagulbol niini.