Pamolitika sa trahedya

Sakit ang trahedya nga miigo sa kapin sa 3 mil ka mga molupyo sa Barangay Duljo-Fatima human naugdaw ang ilang mga panimay atol sa adlaw sa Pasko.

Di lalim ang magpuyo sa evacuation center. Gikinahanglan sa mga biktima sa sunog ang tinuod nga pagtabang gikan sa mga opisyal sa gobiyerno.

Apan subo nga palandungon nga taliwala sa trahedya ug kasakit mas gipili sa ubang mga opisyal ug politiko nga mokabayo sa ilang gidangatan.

Gigamit sa mga way puangod nga mga opisyal ug politiko ang nahitabo alang sa ilang propaganda.

Pananglitan, gisaway sa oposisyon ang mga opisyal sa dakbayan nganong wala iagi sa barangay ang paghatud sa mga hinabang.

Gihimong isyu sa mga kaatbang sa politika ni Mayor Tomas Osmeña tungod kay dili niini kaalyado sa politika ang kapitan sa Duljo.

Pastilan, importante pa ba nila kinsay agian sa hinabang? Ang labing mahinungdanon niabot ba ang hinabang ngadto sa mga biktima.

Si Konsehal Pastor Alcover Jr. misuway og baraw sa resolution ni konsehal Dave Tumulak pagdeklarar sa Duljo ubos sa state of calamity.

Gikwestiyon ni Alcover kun polisiya ba sa administrasyon nga laktawan ang mga opisyal sa barangay.

Nilusot ra hinuon ang resolution ug nadeklarar gyud ang Duljo ubos sa state of calamity.

* * *

Sulod na sa pipila ka adlaw nga gisudlay sa kapolisan ug militar ang kabukiran sa Negros Oriental.

Ubos sa gitawag og “One Time, Big Time” operation gisilbi sa kapolisan ang labing minus 101 ka mga search warrants.

Sagad sa nahimong target gidudahang sakop sa mga rebeldeng NPA. Unom ang napatay ug dunay 17 nga nadakpan.

Ang kadagkuan sa kapolisan mihimakak nga ilang target ang mga rebelde, apan dili matago nga ang hapit tanang subject sa operasyon gidudahang rebelde.

Kabahin na ba kini sa bahad ni Presidente Rodrigo Duterte nga puhagon ang rebelyon sa dili pa siya mokanaog sa Malacañang?  Hinaut nga way inosente nga maangin.