Transgender ug marijuana sa Miss U
Mikulit og kasaysayan sa Miss Universe ang pangalan nga Angela Ponce.
Siya ang labing una nga transgender nga kandidata sa bag-o lang nahuman nga Miss Universe nga gipahigayon didto sa Bangkok, Thailand.
Si Angela Ponce nga kandidata sa nasud nga Spaña ang labing una nga transgender nga miapil sa Miss Universe nga gipanag-iya kaniadto sa Presidente sa Amerika nga si Donald Trump human wagtanga ang pag dili sa pagsalmot sa mga transgender sa prestihiyosong indigay sa kaanyag niadtong tuig 2012.
Wala man tuod makadaug sa indigay sa kaanyag nga iya lamang unta sa mga babaye nga dili operada, apan gibantayan sa katawhan ang talento, karisma ug aktibismo ni Angela Ponce.
Para nako dili maayo nga paapilan og transgender ang Miss Universe kay makahatag lamang kini og kalibog sa prestihiyosong titulo nga Miss Universe.
Sa akong pagsabot ang titulo nga Miss Universe para lamang kini sa mga tinuod nga babaye ug walay labot niini ang mga operada.
Samtang akong gipanalipdan ug gisuportahan ang katungod sa mga transgender apan sa mga kompetisyon nga sama sa Miss Universe mas maayong ilahi sila ug dili isagol sa mga babaye kay lahi ra gyod.
* * *
Pabor si Miss Universe 2018 Catriona Gray nga himuong legal ang Medical Marijuana.
Kini basi sa tubag ni Catriona Gray sa Questions and Answers portion sa competition.
Kay midaug si Gray sa kompitesyon buot bang ipasabot niini nga nakauyon ang mga hurado sa iyang tubag sa pangutana.
Kay nakauyon man ang mga hurado sa tubag ni Catriona buot bang ipasabot niini nga uyon usab sila nga himuong legal ang Medical Marijuana?
- Latest
