EDITORYAL - Nakabenepisyo ba ang kabus?

Ang kaugmaran sa usa ka lugar  usa ka senyales sa kamalambuon sa kalihokan sa pamatigayon, apan wala diay kini nagpasabot nga himsog ang ekonomiya niini ug nakabenepisyo ang mga kabus.

Ang Deutsche Bank sa report sa Philstar.com mihulagway sa ekonomiya sa Pilipinas nga nalabian kapaspas ug kalapad, apan tungod sa kapaspas niini dili na makasugakod paglahutay.

Matud pa nga nag “overheating” karon ang ekonomiya sa Pilipinas kay di na kaapas sa nagkadako nga demand hinungdan sa pagburot sa mga presyo sa mga palaliton ug unang apektado ang mga kabus.

Paspas tinuod ang pagdaghan sa mga buildings, mga imprastraktura apan milupad man sab kapaspas ang inflation rate ug nagkagamay ang bili sa kwarta nga lisod pangitaon sa mga ordinaryong tawo.

Sumala pa sa maong bangko, ang kakusog sa pagsaka sa demand sud sa nakalabay nga tulo ka tuig nakapasaka sa inflation sa Pilipinas nga nilapas pa sa target sa Bangko Sentral.

Ang kasamtangang alkanse niabot og 3.3 porsiyento (gross domestic products). Mao na kini ang kinatas-an sud sa nilabay nga 19 ka tuig.

Nangita og pamaagi ang Bangko Sentral pinaagi sa pagpataas sa mga interest rate ngadto sa 1.75 porsiyento sugod niadtong bulan sa Mayo. Kini aron ang mga tawo magduhaduha pagpangutang ug di magusik-usik sa ilang kwarta. Tungod niini moubos ang demand ug makapahinay sa pagsaka sa mga presyo sa palaliton apan makapamenor kini sa ekonomiya.

Nindot kaayo paminawon nga paspas ang pagsaka sa ekonomiya bisan pa man og nalansang karon ang growth rate sa Pilipinas sa 6 porsiyento sud na sa tulo ka kwarter, apan kining 5.2 porsiyentong inflation rate nga pagsaka sa presyo sa palaliton, nakaapektar sa kinabag-an sa mga gagmay og sweldo.

Karong sunod tuig planong ipatuman na usab ang ikaduhang hugna sa TRAIN Law ug laing dugang kalbaryo nga latason gipaabot nga mosaka na usab ang kasamtangang  mga presyo sa palaliton.