Problema sa mga libudsuroy

Mokabat sa 60 ka kabataan ang naluwas sa otoridad gikan sa kadalanan niining Dakbayan sa Sugbo sa niaging semana.

Kasagaran niining mga batan-on mga libudsuroy ug anaa na nagpuyo sa kadalanan.

Kasagaran sa mga naluwas nga kabataan nagpangidaron gikan sa dos hangtud sa 15 anyos ug gi-turnover sa kapolisan ngadto sa ilang pamilya.

Ang uban tua gidala ngadto sa Department of Social Welfare and Development.

Hinuon giangkon sa kapolisan nga mamalik ra gihapon kining giluwas nga kabataan ngadto sa kadalanan ug manglimos, ilabina didto sa uptown area ning dakbayan.

Kini tungod lagi kay walay ikabuhi ang ilang ginikanan kanila.

Gumikan lagi kay naanad na sila nga magyampungad sa kadalanan, lisod na nga mapitol kining mga libudsuroy. Kini ilabina nga dili usab pursigido ang otoridad ug ang kagamhanan sa dakbayan paghipos kanila.

Usa lamang nga paagi ang gikinahanglan pagsulbad niining mao nga problema.

Kini mao ang subsob nga paghipos niining mga batang naglatagaw sa kadalanan. Kay kon kada adlaw kini sila nga hiposon sa otoridad, magpanagana sila nga mobalik sa karsada.

Dili nato ikalimod nga hugaw gayud tan-awon ang presensiya niining mga libudsuroy sa kadalanan. Naghatag kini og bati nga imahe sa dakbayan, ilabina karong panahona nga grabe ang paningkamot sa lokal nga kagamhanan pagdani og mga mamumuhonan ug turista.

Usa pa, daghan kanila ang gigamit sa mga sindikato pagpakilimos sa mga naglakaw sa dalan, ilabina ang mga langyaw’ng turista.

Adunay insidente nga kung dili gani mohatag ang gilimosan, kulatahon dayon kini niining mga libudsuroy.

Angay lamang nga mohimo og dinaliang aksiyon ang kagamhanan batok niining maong problema.

Kay kon pasagdan lamang sila, moabot ang panahon nga lisod na unya sila makontrol sa otoridad.