Mipalit og tambal taxi giklaman

Ginaingon nga kon ang dosage sa tambal masobrahan, imbes maalim ang sakit, mapun-an hinuo’g laing sakit ang pasyente ug delikado pang mamatay. Kana lang mga anesthesiologists, amping kaayo na sila paghatag og eksaktong sukod sa anesthesia nga ilang idapat ngadto sa masakiton nga operahanan. Kay kon manobra, basig dili na makamata ang pasyente ini’g humag disdis-abli sa dughan, molahos na lang kini’g katulog hangtod sa kahangtoran.

Mao pud kini ang gibuhat sa taga CITOM ning istrikto nilang pagpatuman sa WHEEL CLAMPING AREA nga balaod. Walay pili. Ma-porlon man, o ma-abulansiya, basta magpatuyang og parking, bilanggoon gyud ang ligid sa puthawng clamp.

Saludo ko ning gihimo sa CITOM. Kay daghan gyung drayber nga gahig ulo.  Kana lang among agianan nga igo lang makaagi ang duha ka nagkasugat nga sakyanan, parkingan gyud pirme sa mga badlongon kada gabii. Dinhay usa ka buntag nga sa among pag-agi may tulo ka kotseng giklaman. Nagtuo ko nga magpadayon na kadto. Pero wala na gyud usbi!

Hinuon, diha sa Fuente Osmeña, kanang gilarayan sa mga botika, kan-anan ug uban pang matang sa negosyo, walay buluyagon nga makalusot diha sa mga igmat mata sa CITOM.

Usa ka concerned citizen miduol nako ug misugilon nga  lapas na kuno sa  12:00 midnight, may taksi nga miparking duol sa botika. Nagdaling nanaog ang drayber ug misulod sa pharmacy aron mopalit og tambal kay nasakit ang asawa.

Nakit-an sa nagpatrolyang CITOM ang taxi. Gani, nagpakiluoyng miesplikar ang drayber nga nagdala na sa pinalit niyang medisina.  Ay, no mercy! Giklaman gihapon sa CITOM  ang kahilakong taxi drayber.

Luoya sa drayber. Menus iyang kita adtong adlawa, unya nakabayad pa’g P1,500 nga multa. Ug kinahanglan gyud nga mobayad siya dayon kay nagpaabot baya iyang masakitong asawa sa tambal. Overdose ra ang disiplinang gihatag nila sa drayber. Makamugnag daotang sangpotanan!

Ang nakanindot kay amigo sa concerned citizen ang mga CITOM nga mi-clamp. Gipangutana silang Ner (di tinuod ngan) nganong wala sila maluoy sa drayber? Nganong wala nila kini hatagig diyotayng konsiderasiyon? Usa ray gitubag sa CITOM.

Igo ra kuno silang mituman sa nagsugo nila. Nakalingolingo ang concerned citizen. Sa hilom, nakatuaw: ‘Hasta ba sila, natakdan sab sa pagkagahig kasingkasing?’