Sayon nalang ang pagkutlo sa kinabuhi

Sunod sunod ang nahitabo nga brutal nga pagpatay nga naglakip sa 62 anyos nga babaye didto sa Talisay kansang lawas gisulod sa refrigator.

Nadakpan ang suspek sa krimen nga kanhi mga trabahante kuno sa biktima diin usa sa gitan-aw nga motibo ang pag panulis. Apan hugot nga gipanghimakak sa suspek ang pasangil.

Samtang sa syudad sa Sugbo gipatay usab ang usa ka dalaga sulod sa giabangan nga lawak.

Naputos sa dinunggaban ang lawas sa biktima hinungdan sa iyang kamatayon.

Tulis gihapon ang gitan-aw nga motibo sa krimen sanglit nawala man ang iyang cellphone.

Nakasinggit pa man kuno ang biktima sa wala pa kini patya apan wala gyud motabang ang mga tawo nga nakadungog kay nagtoo nga away lang kadto sa iyang uyab.

Apan sa pakisusi sa mga otoridad dili uyab sa biktima ang suspek kinsa bag o lang laya sa bilanggoan.

Unta kon naminaw ug nitabang ang kauban sa balay nga giabangan sa biktima naluwas pa unta kini og posibleng nadakpan ang suspek.

Apan subo palandungon nga murag wala nay pakialam ang uban nga bisan nakakita ug nakadungog magpakabuta bungol lang walay pagpakabana.

Samtang laing patay nga nahitabo diin usa ka pump boy sa gasolinahan ang gipusil patay sa wala mailhing mamumuno.

Ang ingon niini nga panghitabo murag kasarangan nalang alang sa uban nga wala nay epekto sa pagpaminhod sa lawas sa kangilgig nga bation kon masayod nga dunay gipatay.

Kini gumikan seguro kay naanad na ang pag bati sa mga tawo sa mga saksi sa dugoong panghitabo.

Kumusta naman ang imbestigasyon sa kapolisan sa mga pagpamatay sukad sa una wala pa may resulta.  Wala man gani matumbok pa kinsa ang mga kriminal?

Unta dili lang kutob sa pag-ihap kon pila na ang mga namatay kon dili mag- ihap na sab unta kon pila ang nasulbad ug pila ang nahatagan og hustisya.

Apan basin kutob nalang ang tanan sa pangindahay nga wala gyuy katumanan.