Militar bilang Customs labag sa Konstitusyon
SABI sa Konstitusyon, Artikulo XVI, Mga Tadhanang Pangkalahatan. Seksyon 5 (4): “Ang sino mang kaanib ng sandatahang lakas na nasa aktibong paglilingkod ay hindi kailanman dapat hirangin o italaga sa alin mang tungkulin sa isang katungkulang sibilyan sa Pamahalaan gayon din sa mga korporasyong ari o kontrolado ng pamahalaan o sa alinmang mga sangay nila.”
Dahil diyan, bawal ipasa-kamay ni Presidente Duterte sa sundalo ang Customs. Gaano man siya at ang mamamayan kaasiwa sa katiwalian sa ahensiya, ang pagdidispatsa ng militar ay hindi solusyon. Mag-isip dapat agad ng iba pang pamamaraan. Kundi’y maaksaya ang panahon; kukuwestiyunin lang sa Korte Suprema ang utos ni Duterte. Makakapagpuslit ng tone-tonelada pang shabu sa pier, at mawawaldas sa “tara” ang dapat na kita ng gobyerno mula sa import duties.
Utos sa kasundaluhan na ipagtanggol ang Konstitusyon. Saad sa Artikulo XVI, Seksyon 5 (1): “Ang lahat ng mga miyembro ng sandatahang lakas ay dapat manumpa nang taimtim o magpatotoo na ipagsasanggalang at ipagtatanggol ang Konstitusyong ito.”
Pati ang Presidente ay obligadong itaguyod ito. Takda ng Artikulo VII, Kagawarang Tagapagpaganap. Seksyon 5: “Bago magsimula sa pagtupad ng kanilang katungkulan, ang Pangulo, ang Pangalawang Pangulo, o ang Nanunungkulang Pangulo ay dapat magsagawa ng sumusunod na panunumpa o pagpapatotoo:
“Mataimtim kong pinanunumpaan (o pinatotohanan) na tutuparin ko nang buong katapatan at sigasig ang aking mga tungkulin bilang Pangulo (o Pangalawang Pangulo o Nanunungkulang Pangulo) ng Pilipinas, pangangalagaan at ipagtatanggol ang kanyang Konstitusyon, ipatutupad ang mga batas nito, magiging makatarungan sa bawat tao, at itatalaga ang aking sarili sa paglilingkod sa Bansa. Kasihan nawa ako ng Diyos.’ (Kapag pagpapatotoo, ang huling pangungusap ay kakaltasin.)”
- Latest
