Ang plastik nga kalibutan sa politika

Kataposang adlaw karon sa pagduso sa Certificate of Candidacy o COC sa mga nagtinguha nga moserbisyo kuno sa katawhan, ambot lang!

Bitaw, panahon karon sa mga tawo nga nagtinguha nga magpapili sa umaabot midterm elections.

Tinggawas na sa mga plastik nga lami kaayong idul-it sa kalayo aron malanay, pwera lang niadtong fireproof plastic, naa ba kahay dili dutlan og kayo nga plastik? Daghan o halos man siguro tanan.

Kong ang kalibutan sa showbiz pulos scripted tungod sa kaplastikan, mas labaw pa ang politika.

Tiaw mo na nga sa una suod kaayo nga pulos tam-is nga sinaaray ang makita ug madungog sa mga kaalyado, apan karon lahi naman ang sitwasyon kay sa kanhi kaaway namam nakig close.

Wala gyud diay forever, ang tanan tilaw tilaw lang, bawal ang faithful sa politika tungod kay ang loyalty anaa ra gyud sa ilang kaugalingon.

Mas unahon gyud ang kaugalingon kay sa uban, mao kini ang prinsipyo nga gisunod sa kadaghanang politiko hinungdan nga himoon gyud ang tanan alang sa ilang political survival.

Mabasol ba nato sila? bisan pa og basulon nato wala silay pakialam tungod kay wala naman mauso ang kaulaw ug ang pag tan-aw sa utang kabubot-on.

Pait lang hunahunaon kay gamiton nila ang mga tawo alang sa ilang personal nga interes.

Ang mabasol kini dili ang mga politiko kon dili ang mga tawo nga andam kanunay nga magpabiktima sa mga politiko bisan og kapila na sila gipahimuslan.

Dunay mga politiko nga tam-is na kaayo og pahiyom nga kanunay na gyud makit an sa mga suok-suok apan kaniadto ni anino dili gyud makita.

Dili man tanan, apan kadtong mga magpapili sa katungdanan nahisama sa mga butang nga anaa sa basurahan.

Depende na nato unsaon pagbahig ang mga plastik nga basura.