Gitandi sa Lotto 6-58

Sa milabay’ng duha ka eleksiyon kaniadtong 2013 ug 2016, kaming mga lalaking reporter sa Cebu City Hall, wala gyud mosipyat sa among panglantaw kon kinsa ang modaog sa mga kandidato.

Karon, gitan-aw na usab namo ang han-ay sa mga kandidato sa dakbayan sa habig sa Bando Osmeña Pundok Kauswagan (BOPK) ug sa Barug PDP.

Atubangan sa higala namo nga opisyal sa Comelec, gipirmahan namo ang among gitan-aw nga modaog.

Ang among gibasehan mao ang “kahumot” sa mga kandidato ngadto sa mga botante.

Dunay uban nga nagbalikbalik na lang sa paglansar, ug namasin nga mahimong opisyal sa siyudad.

Pero sa pamahayag sa usa ka higala nako gikan sa usa ka politikanhong grupo nga sayon pa kuno dag-on ang Ultra Lotto 6-58 kay sa ang maong kandidato modaog.

Ingon niini ang among panglantaw. Sa mga konsehal, lig-on kaayo og mga kandidato ang BOPK sa north district, apan lig-on sab og mga kandidato ang Barug PDP sa south district.

Hinoon, ang kadaogan sa usa ka kandidato magdepende kon maayo sila nga mopasabot sa katawhan kon ngano nga sila angay’ng pilion ug himoong opisyal sa atong siyudad.

Busa, paspas gyud mo og pangampanya. Kadtong mga luya na og tuhod, posibleng alkansehon gyud sa pagtungas sa mga bungtod aron adtuon ang panimalay sa mga botante.

Swerte kaayo ang mga ilado na nga kandidato. Apan ang usa ka ilado dili basehanan nga kini modaog. Dunay uban nga moingon nga ang kandidato nga kalit lang moabot ug magpaila sa katawhan atol sa kampanya, maoy gitawag og “maya.”

Ang langgam nga maya, mokalit lang pag-abot sa atong mga umahan kon ang mga humay mamunga na og makaon na nila.

Nagpasabot nga angay gyud unta sila nga mopakita sila sa katawhan nga moserbisyo usa, dili kay sundon nila ang batasan sa langgam nga maya.

Mao kini ang rason nga si Kongresista Raul del Mar nagkatawa lang nga atbangan siya og artista kay nasayod siya nga ang katawhan makasabot kon kinsa ang moserbisyo kanila.

Unya, bentaha usab ang “name recall.” Kanang sikat ang ngalan kay gibalikbalik sa media, basta dili lang daotan ang pagkasikat.

Mora’g ingon niini ang sitwasyon ni Mabolo Barangay Captain Niña Mabatid nga midagan pagka konsehal sa Barug PDP.

Kon may sunog ug ubang katalagman, pabor sab kadtong mohatag og mga hinabang.

Nakabenepisyo niini si Leah Japson nga kandidato sa BOPK sa north district kay siya maoy hepe sa DSWS nga tighatag og mga pagkaon ug hinabang sa mga biktima.