Lotto dakong suliran sa makadaog

Kataw-anan. Grupo sa managhigalaay, kinsa nagtampo-tampo og igong kantidad aron ipalit og system 7 sa Lotto, nagpangutanahay: “Pastilan, simbako, kon kitay modaog sa P854 Milyones nga jackpot, bay, dili kaha mameligro atong kinabuhi?

Simpleng pangutana nga nagdala’g kabug-at sa panghunahuna unsaon paggambalay og mga safety measures ang dapat planohon daan sa dili pa moabot ang higayon nga ikaw o kamo, among mga Banat readers, maoy makakuha ning gikagubtang 6/58 Lotto Jackpot.

Bisan ang mga buta ug ubang makililimos nangandoy sab nga maoy makadaog. Unsa na kaha, ang mga adik-adik, tulisan, kidnapper ug uban pang daotang elemento nga naglublob sa bisan asang suok ning dugoon tang panahon? Dili kaha, sila mamahimong suliran niadtong suwerteng tawo, kinsa maoy makahakop ning makainggit nga gidak-on sa salapi?

Kining hapit na mobilyon ka pesos nga lotto jackpot, nagpruweba lang, nga kon kitang tanang Pinoy, gikan sa kabus ngadto sa adunahan, batasanon lang ang paghatag og donasyon sa simbahan, pagkadali ra gyud diay tigomon ang minilyon ka pesos nga atong ikatabang labi na ngadto sa pobreng parokya nga anaa gitukod sa kabukiran.

Bisa’g diha lang unta sa sibot panahon sa opertoriyo, kon tultolon lang sa manimbahay ang paghulog og kinasingkasing nga kantidad, tingali, dili na unta magkapangkapangka’g padala og solicitation letters ang kaparian para sa mga dinagkong kalihokan ug diniyos nga panginahanglan.

Apan pipila lang kaha ang nakasabot sa giingon sa Ginoo, nga kutob sa blessings nga inyong madawat gikan Nako, ihatag ang 10% niini balik sa simbahan?

Ang mga gagmay kon tiponon mahimong dako, kay ang dako gikan man sa  gamay. Labi na, kining Train Law nga nanghasi sa atong nasod karon, diin grabe ang pagtaas sa mga buhis nga bayranan?  Dinhi, atong makuwenta pila ka billion pesos ang mapunta sa gobiyerno gikan sa taxpayers matag bulan?

Mao sab kini ang nahitabo sa lotto. Sanglit gidumdom siya’g hungit sa katawhan og kuwarta bugti sa numerong gipalit, miabot nag minilyon ka pesos ang naipong premyo.  Ug kon, ikaw, Banat reader maoy modaog, dili ka angay’ng maglipay. Kay di gyud kalikayan nga may masugatan kang dinagkong suliran ning adlaw, nga sa usa lamang ka pamilok, nahimo kang instant millionaire.