Nangangkon sa yuta apan way dokumento nga gikuptan

Dear Atty. Divine:

Ang akong mama dunay kabilin nga yuta sa among probinsya. Sa dihang namatay ang akong mama akong gi-process ang pag-transfer sa title niini ngadto sa akong pangan. Last month miadto ko sa among probinsya ug akong gisusi ang akong yuta ug nakurat na lang ko kay portion sa maong property giangkon sa usa ka tawo ug gani iya nang gitukuran og balay. Sa dihang ako kining gipatawag sa barangay wa siyay gipakita nga Deed of Absolute Sale nga pirmado sa akong mama, miingon siya nga verbal lang daw ang sabot nila sa akong mama  apan miingon siya nga ang iyang silingan andam  daw nga mo execute og Affidavit  pagmatuod nga napalit niya ang maong portion gikan sa akong mama. Ang akong pangutana kon valid ba ang iyang claim? Daghang salamat.  — Leona

Dear Leona:

Ang atong Civil Code  nag-require gyud nga kon mag-involve gani og transfer of rights sa  usa ka real property sama sa yuta  sama sa pagbaligya o pagdonar niini, kinahanglan gyud kining himoon in writing or else dili ka maka-enforce niini ngadto sa korte. Buot ipasabot nga dapat naa gyuy mapakita nga Deed of Absolute ang claimant nga pirmado sa imong mama ug notarized gyud aron pagsuporta sa iyang claim. Kanang gisulti sa claimant nga Affidavit sa iyang silingan pagsuporta sa iyang claim dili na makabarug sa korte. Busa ang maayo nimong buhaton mao ang pagpadala kaniya og Notice to Vacate ug kon iya  kining ibalewala then imo gyud siyang pasakaan og Ejectment case. Thanks and God bless. —Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] og akong tubagon ang inyong pangutana pinaagi sa akong column matag Miyerkukes, Sabado ug Domingo.