Mercury drug Fuente gidayeg sa seniors

Tungod sa atong mga pagkaon karon nga sagad may preservatives nang gisagol nga makadaot sa panglawas, lisod kaayo abton ang edad nga iyaha sa mga senior citizens.

Kana lang mga utanon nga gipamaligya sa Carbon Market, dili ta makasiguro kon luwas ba kining kan-on kay ultimong kamunggay, imbes tubig ray ibisibis, sambogan mag pormalin sa namaligya aron ang mga dahon magpabiling presko tan-awon.

Mga prutas? Dili na sab luwas. Kay kana lang mansanas nga imong gikaon kada adlaw may preservative wax nang gihapin sa panit aron dugay madunot. Ambot, nganong makalusot ni, uy?

Among Assistant Branch Manager Ma’am Elsie, usa ka vegetarian, sa wala pa moretiro, nagsige’g pahimangno namo, nga aron pagsiguro sa utanon ug prutas nga gikaon walay makahilong pesticides, kemikal o preservatives nga gigamit, kinahanglan kita gyud mismoy mananom ug mopupo niini.

Nindot nga ideya. Kana kon may tanaman tang katamnan! Pero, kon ang empleyado suweldo ray gisaligan.  Unya, wala pa gyuy tubotubo samtang ang presyo sa inadlawng palaliton sige’g saka. Lisod, uy! Lisod gyud abton ang edad sa senior citizen.  Kay kon dili ka mamatay’g sayo sa kawad-on, atakihon ka sa konsimisyon.

Hinungdan, ma-Senior Citizen na gani ang tawo, magpuyos  siyag daghang sakit. Diabetes, highblood, prostate, kidney, colon, liver,  lung problem ug uban pa nga nangayog dinagkong kantidad para ipalit sa daghang gimintinar nga tambal.

Ang pait, kay dili tanang medisina anaa sa tanang botika.  Kana lang mestinon, ultibro ug omnaris nga akong inadlaw’ng tambal, maoy pangitaon kaayo. Halos tanang botika ang  giduol, mibalibad. Hurot na...kuno!

Pero, bilib ko ining Mercury Drugs, Fuente Osmeña. Dili gyud mahutdan! Sa usa ka dosena kong  med maintainance, tanan naa pirme sa maong botika.

May solo lane pa nga alang lamang sa senior citizens. Dunay inandam lingkoranan, mga matinabangong pharmacists nga daw mga anak buotang mosilbi sa masakiton nilang ginikanan (nga ang kapaspas gyod mokuha ug mo-release sa order sa mga SC.) Sa laktod, on customers service, they are the best!

Feel at home ang mga SC niining botikaha. Gidugok kanunay sa mga seniors, kinsa sama nako, nakadayeg sa diniyos ug langitnon nilang pagpangalagad sa mga masakiton.