Nagpatuo nga LTO

Ang pag-ilis sa tanang polis sa usa ka dapit mahimong dili magbunga og kaayohan. Mangutana kamo og ngano?

Ang mga bag-ong polis nga gidestino sa usa ka dapit, wala pa gyud kaayo masuhito sa ilang teritoryo.

Hinoon, kon akong basehan mao ang beterano nga reporter nga idestino sa usa ka bag-ong assignment, makakuha man gihapon kini og maayong balita, apan sa bag-o pa, dili pa siya epektibo kay wala pa niya makaila ang mga tawo sa iyang palibot.

Ingon usab niini ang mga bag-ong polis kay wala pa sila’y mga asset nga maoy tighatag kanila og mga kasayuran nga makatabang kanila sa ilang trabaho. Kinahanglan pa usab sila nga maniid kon kinsa ang mga tawo nga anaa sa ilang palibot.

Ang tanang mga polis sa Talisay City gipanghulipan sa ilang katungdanan tungod sa pamahayag ni Presidente Duterte nga adunay uban kanila nga nalambigit sa ilegal nga drugas, ang uban protektor ug mogamit usab og drugas.

Apan kaniadto gyud kay adunay mga polis sa Talisay nga nagsilbi nga protektor sa druglord nga si Franz Sabalones.

Gikulbaan gani ko kay nakadungog ko’g tabitabi nga target kuno kini sa mga sakop sa hunter’s team.

Ang nakanindot lang sa pagrelibo sa tanang polis sa Talisay kay maputol na ang ilang koneksyon, apan sigurado ko nga may uban gihapon kanila nga mobalik diha og mangayo gihapon og payola gikan sa mga drug lords.

* * *

Gitataw ni higalang LTO-7 Regional Director Vic Caindec nga gimandoan na diay niya ang tagdumala sa usa ka opisina diha sa atbang sa JCenter Mall sa Mandaue City nga tangtangon ang billboard nila nga adunay logo sa LTO.

Maayo kay nakasabot si Caindec nga gigamit ra ang logo sa LTO sa negosyo niining mga nagdumala sa maong opisina.

Para nako, ilegal gyud ug malisyuso ang paggamit sa maong logo sa LTO hinungdan nga may mga drayber tawon nga nabiktima.

Nagtuo sila nga mao na kini ang opisina sa LTO nga mo-process sa ilang lisensya, apan diay drug testing center man diay.

May basehanan baya ang reklamo sa drayber ngadto sa maong opisina.

Gihunahuna gyud nako kon ngano nga nagbutang man og logo sa LTO ang maong opisina nga ang drug testing center, dili man ubos sa pagdumala sa LTO?

Ang mga drug testing center gidumala man sa Department of Health.

Klaro kaayo ang modus nga ang tagdumala sa maong opisina gusto nga magpatuo nga ang ilang opisina extension sa LTO. Sa laktud, angay kini nga ipatangtang.