Bootleg Beatles outlet di friendly

Unsay bation sa mga ginikanan kon sila surprisahon sa ilang anak, kinsa atua na manginabuhi sa layo, pinaagi sa pagpahibalo nga thru on line credit purchase,  gipalitan  sila og Bootleg Beatles Concert ticket, diin mao pa gyoy gipili ang kinamahalang Gold VIP seats?

Niadtong 1960’s ug 1970’s misugod pagsikat ang banda sa Beatles nga gilangkoban nilang John Lennon, Paul Mc Cartney, Ringo Starr ug George Harrison

Hangtod karon makita sa Youtube ang ilang mga album ug miani gihapon og minilyong viewers.

Gani, ubay-ubay sa ilang orihinal nga kanta sama sa Help, Imagine, The Long and Winding Road, Let it Be ug uban pa, gikanta-hulaman man sa mga iladong singers, timaan nga ilang mga kanta dili gyod malawos sa pagpanglabay sa panahon.

Among anak , nahibalo nga kaming duha ni Nanay niya, nagsunod pirme sa mga kanta sa Beatles sukad pa niadtong tin-edyer pa kami.

Gani, naabtan pa man niya ang akong pag-sing-along sa mga kanta sa Beatles, diin minus one pa ang uso ug wala pay telon nga mosalida sa mga lyrics samtang naggunit  sa mikropono ug sa nahubog nang serbesa.

Mao nga dili masukod ang kalipay nga among gibati dihang gidala namo didto sa Ticket World outlet sa usa ka mall ang dokumento sa Confirmation of Payment ug authorization letter sa among anak para sa Bootleg Beatles concert ning umaabot Septiyembre 8 nga anha ipahigayon sa IEC.

Sa kamoderno na sa teknolohiya, abi namo’g  dali ra mahatag ang tiket.  Pero, naunsa ba nga gipangayoan man mi’g credit card sa among anak ug valid ID niya nga unta naa na man ni tanan diha sa kompletong purchase transaction nga gikan mismo sa Ticket World?

Di gyud unta sila mohatag apan sa dihang giingnan ko sila nga liable sila kon dili nila ihatag ang tiket nga amo nang nabayran, dinhi pa sila manawag sa Ticket World, Manila.

Ug human sa hapit mousa ka oras namong panag-ergo, diha pa nila gi-release ang surprise gifts nga gipadala sa among eldest daughter, kinsa nahimong tam-is nga bunga sa grabeng pagpaningkamot namong misis aron among anak makaadto sa dapit nga gusto niyang adtoan.