Si Duterte bray nakahimo

Human mapalagpot ang diktador nga si Ferdinand Marcos sa Malacañang, ang mga tawo taas og panglantaw nga maalim ang mga samad sa Pilipinas gikan sa Martial Law. Mipuli si Cory Aquino isip revolutionary president ug nagmalipayon ang mga Pilipino sa demokrasya.

Ang kalihim sa depensa ni Marcos nga si Fidel Ramos maoy mipuli kang Cory. Si Ramos gipulihan ni Erap Estrada pero gidemalas kay napapha. Iyang bise presidente nga si Gloria Arroyo ang mipuli. Sa 2010 nga eleksiyon, ang mga Pilipino misakay sa gitawag og “Aquino fever” sa dihang namatay sa kanser si Cory. Ang anak nga si Noynoy ang midaog.

Sa presidency ni Noynoy migrabe ang sakit sa nasud. Migrabe ang drugas tungod sa pagpasagad sa liderato.

Si Noynoy mitudlo kang Leila de Lima isip kalihim sa hustisya. Ang kanahan nakig-concert sa mga druglord sa National Bilibid. Ang mga druglord mitabang niya nga mahimong senador. Demalas lang kay napriso tungod sa kaso nga pagprotehir sa mga druglord.

Sa 2016, 16 milyones ka mga Pilipino ang miboto kang Pres. Rody Duterte tungod sa saad niini nga pulpogon ang ilegal nga drugas sulod sa tulo ngadto sa unom ka bulan.

Sukad na-presidente si Duterte, daghan ang natumba nga mga drug personalities, apil na ang mga polis nga miapil na sa negosyo sa drugas o padayong nagprotehir sa mga drug personalities.

Dinhi sa Sugbo, 11 na ka mga polis, duha ka sakop sa Philippine Drug Enforcement Agency (PDEA-7), mga kanhi polis, opisyal sa barangay ang natumba.

Si Mayor Tomas Osmeña miingon nga dili na “safe” ang Sugbo tungod sa patay. Apan kinsa man ang gipamatay?

Ang mga tawo walay dautan nga reaksiyon sa mga nanghitabong patay. Tungod kay nasayod sila sa mga rekord sa mga tawong nangatumba.

Si Gobernador Hilario Davide III miingon nga kuyaw manglayas ang mga negosyante tungod sa patay. Pero para nako, ang mga negosyante sa ilegal nga drugas ang manglayas, dili ang mga tawo nga wala maghimo og dautan.

Abi nako og uyon si Osmeña kon pamatyon ang mga dautan, ilabi na ang mga drug lord. Nganong mura naman hinuon og iya kining gilabanan?

Saba ang media tungod sa sigeng pagpamatay. Siyempre, trabaho sa media ang pagpangita sa tinuod. Apan ang mga tawo mipakpak sa hilom sa pagkatumba sa mga gipamatay.

Apan awhag nako sa akong mga amigo sa media, paghimo og investigative journalism sa tanang mga tawo nga gipangtumba aron masubay unsay ilang pagkatawo. Tan-awon nato unsay ilang mga binuang.

Dili ko uyon nga adunay patay. Pero dili usab ko uyon nga magpabilin ang mga kriminal, hasta na ang druglord, drug pusher ug mga adik.

Pila na ka bata ug tawo ang nangamatay tungod sa drugas? Sa tanang presidente, si Duterte lang ang naka-ako pagpatumba nila.