Angay idispatsar sa puwesto

Unsa kahay birtud ni Presidential Communications Assistant Secretary Mocha Uson nganong pabilin kining naglingkod sa iyang katungdanan taliwala sa mga seryosong kontrobersiya nga iyang gikalambigitan.

Taliwala sa mga pagsaway, kiber lamang si Uson. Alang kaniya, dili kini makaapekto sa iyang pagkatawo. Apan ang wala niya natino mao nga kining mga kontrobersiya nga iyang gikalambigitan dako og epekto sa ka sagrado sa katungdanan nga iyang gihuptan.

Ang labing ulahi nga kontrobersiya nga iyang gikalambigitan mao ang video nga nag-trending karon sa social media mahitungod sa giingon nga iyang pagyagayaga sa kampanya sa kagamhanan pagsagop sa nasud sa pederalismo.

Sa maong video makita nga nagsayawsayaw ang iyang co-host sa usa ka online show nga nagbungat og “pepe” ug “dede” nga nagtudlo sa iyang mga bahin sa lawas. Kini isip kabahin sa kampanya pagpasabot sa katawhan kabahin sa pederalismo.

Miani og halapad nga pagbatikos ang maong ilang pakulo. Wala ug tuo ang kritisismo ang paglapdos kang Uson. Daghan karon ang nanawagan nga mas maayo nga mo-leave una siya sa iyang katungdanan tungod sa maong kontrobersiya.

Gani, daghan usab ang mipetisyon alang sa resignasyon ni Uson. Kini tungod lagi kay nagkabug-at na siya nga palas-anon sa administrasyon ni Presidente Duterte. Siyaro man usab kon dili pa gayud maulaw si Uson niining nagkadaghan nga nag-alburoto batok kaniya.

Kon aduna pay delikadesa si Uson, angay na lamang siya nga mo-resign sa iya nga katungdanan. Didto sa Japan, gamay lamang nga kontrobersiya nga ilang gikalambigitan tulin pa sa manatad nga mokanaug sa puwesto ang mga opisyal didto.

Panahon na nga idispatsar si Uson gikan sa iyang puwesto. Kon ako pay Duterte, ako nang gipapha sa iyang katungdanan ang maong opisyal tungod niining bag-ong kontrobersiya. Apan unsa man gyud kaha ang gahum ni Uson nganong pabilin kining mikapyot sa puwesto.