Biktima o kriminal?

Taliwala sa pasangil nga ang napatay nga polis nga si PO3 Eugene Calumba misuway pagbanhig ni konsehal Jessielou Cadungog sa Barangay Tejero, giduphan siya og maayo sa iyang mga labaw.

Si Police Regional Office-7 director Chief Supt. Debold Sinas miingon nga si Calumba maoy biktima sa hitabo.

Iyang gihimakak nga buot untang banhigan ni Calumba ug sa kauban niini nga asset nga si Michael Banua ang konsehal.

Matud ni Sinas, si Calumba nga giingong sakop sa Drug Enforcement Unit sa Parian Police Station, gikan ni mihimo og surveillance operation sa Tejero sanglit dako ang problema sa drugas sa maong barangay. Nagkanayon si Sinas nga paingon na untang mopauli si Calumba sa dihang gipusil ni sa driver ni Cadungog.

Ambot kinsay nagtug-an sa tinuod? Apan dunay pipila ka punto nga angayang ipasabot ang kapolisan. Lakip niini ang tinuod nga assignment ni Calumba. Matud ni Sinas sakop sa Parian Police Station ang napatay nga polis, apan ang ilang record nagpakita nga atoa siya madestino sa Traffic Group sa Cebu City Police Office.

Nagsugod ang iyang assignment sa traffic group niadtong Hulyo karong tuiga. Kon, tinuod nga nabalhin na siya sa Parian nganong dili ni maoy naa sa ilang record? Ikaduha, nganong naabot siya sa area sa Waterfront Police Station?

Laing angayang buhaton sa kapolisan aron matugkad ang tinuod mao ang pagsusi sa armas nga nakuha gikan kang Calumba kon dili ba kini maoy gigamit sa mga nangagi nga kaso sa patay.

Sa ingon niini maklaro kon duna ba siyay kalambigitan o wala labi pa nga dunay nga nanggawas nga kasayuran nga nagtugma ang motorsiklo nga ilang gisakyan ug sa gisakyan sa mga responsable sa ubang kaso sa patay.

Pinaagi sa ballistics cross matching masuta pareha ba ang armas nga gigamit ug ang armas nga nakuha gikan sa polis.

Hangtud nga dili ni buhaton sa kapolisan magpabilin ang mga pagtahap nga ilang gitabunan ang tinuod nga pagkatawo ni Calumba ug ang pagduda nga mga awtoridad ra usab ang nagpaluyo niining mga kaso sa patay.