Riding-in-tandem

Kasagaran sa mga panghitabo sa patay, dili lang dinhi sa atong dapit, kondili sa tibuok nasud, gihimo sa mga nagmotorsiklo, riding-in-tandem nga lisud dakpon ang mga perpetrator kay magsul-ob man og helmet nga motabon sa tibuok nawong, ug dali ra nga makaikyas.

In fairness sa kapolisan, lisud kining santaon kay sila ra man ang gibantayan sa mga kriminal. Samtang ang pag-foot patrol deterrent sa commission of crime, dili man sab mo-operate kining mga lawless elements in the presence of the law enforcers. Nahinumdom ko sa among panahon, pirme man mi makakita og mga polis nga magpatrolya sa kadalanan. Hinoon, niadtong panahona pila ra may molupyo sa Opon, diin hapit kaila mi tanan sa tibuok lungsod, busa, lisud kaayo   ang pagbuhat og daotan.

So, atong masabot nga kining mga kriminalidad nga naghamok karon, bunga, o resulta kini sa pagdaghan na sa population, ug maglisod na pag-cope ang atong mga tinugyanan sa balaod pagsanta sa kriminalidad.

May kalabutan pa ba kini sa atong kampanya pagsulbad sa problema sa druga?

* * *

Headline: “5 projects to solve traffic.” Nindot paminawon. Tiaw mo’y masulbad na gayud ang atong suliran sa trapiko. Wala ang-anga kay P209 bilyones gyud ang gastoon alang sa lima ka proyekto sumala sa Japan International Cooperation ( JICA) master plan.

Ang lima: a new bridge, a circumferential road, two railway projects, ug usa ka unified traffic system.

Nindot kaayo. Apan, giingon dinhi nga walay usa niini nga proyekto nga mahuman atol sa termino ni Presidente Digong Duterte nga motapos sa 2022. Sa ato pa, magpabilin kitang magdamgo, ug padayon ang traffic congestion.

Ambot kon nalakip ba kini sa “build, build, build” project sa Duterte administration. Otherwise, humanon gyud ni within the term sa presidente.

Ang 4th bridge nga magkonektar sa mainland Cebu ug Isla sa Mactan, ma-operational sa 2023. Arang-arang na lang ni kay magkadungandungan sa 3rd bridge nga magdugtong sa Cebu mainland ug Cordova sa Mactan.

Ang circumferential road sugdan kuno pagpatupan sa hinapos karong tuiga, apan walay gisitar nga completion date. Ang laing tulo nga proyekto, himoan pa og mga feasibility studies.

Giingon nga kon mapatuman na kining maong mga proyekto, ang average travel speed sa mga sakyanan mo-increase gikan sa 30 ngadto sa 40-km per hour, sa ato pa, ang 21-km nga travel, pananglit paingon sa Liloan, makuha lang og 30 ngadto sa 40 minutos. Nindot.  Apan … !