Dili lang usa apan duha ka tulay ang mapaabot

Sa katapusan, nagsugod na gyud ang trabaho alang sa ikatulo nga tulay nga magdugtong sa mainland Cebu ug isla sa Mactan. Kung walay problema sa konstruksiyon niini, tulo ka tuig ang gidugayon sa katukoran niini ug nga magsugod ang operasyon niini unya sa 2021.

Ang Cebu-Cordova Link Expressway (CCLE) adunay gitas-on nga sobra sa otso kilometros nga magkonektar sa South Road Properties sa Dakbayan sa Sugbo ug sa Lungsod sa Cordova. Usa unya kini sa labing moderno ug taas nga tulay sa nasud.

Maayo na unya ang dagan sa pagbiyahe padulong ngadto sa Mactan Island. Kini tungod kay dili na kinahanglan nga moagi pa didto sa Dakbayan sa Mandaue kadtong mga motorista gikan sa Dakbayan sa Sugbo ug sa southern Cebu.

Atol sa pagsugod sa trabaho sa ikatulo nga tulay, adunay plano nga magtukod og laing tulay nga magdugtong sa Dakbayan sa Mandaue ug isla sa Mactan. Kini ang gibutyag ni Department of Public Works and Highways Secretary Mark Villar.

Hinuon, basi sa pagtuon sa Japan International Cooperation Agency, nagkinahanglan og laing tulay nga magkonektar sa Mandaue ug Mactan tungod kay nagkahuot na ang kasamtangang duha ka tulay. Ug dako ang purohan nga madayon kining maong proyekto.

Dili lamang ang pagka-convenience sa biyahe ang dala sa maong mga tulay. Sa ekonomikanhong aspeto, dako kini og ikatabang alang sa kalamboan sa Metro Cebu. Gawas nga dali na ang pagbiyahe ngadto sa Mactan, makaluag usab kini sa bul-og sa trapiko sa dakbayan sa Mandaue.

Sa pagkakaron, tungod kay tua sa Mandaue ang duha ka tulay, ang maong siyudad maoy nahasngan sa dakong problema sa trapiko gumikan kay didto mag-abot ang tanang motorista nga padulong sa isla sa Mactan gumikan sa kakulang sa alternatibo nga rota.

Sa operasyon sa duha ka bag-ong tulay, gitagna nga moluag na unya ang pag-irog sa trapiko didto sa Mandaue. Ug nagpasabot lamang kini nga hamugaway na unya ang movement sa mga biyahedor ug mga kargamento sa mga magpapatigayon.