Saop gustong papahawaon sa tag-iya sa yuta

Dear Atty. Divine,

Ang akong mama nakadawat og demand letter gikan sa tag-iya sa yuta nga among gitikad.

Mga 30 ka tuig na nga saop ang akong mama, ug karon kalit lang kami nga papahawaon ug ipaguba ang among balay sa yuta nga among gitikad, kay ila na kuno nga gamiton ang property.

Ang akong pangutana kon mahimo ba diay mi nilang papahawaon nga dugay na man mi nga saop nila?

Unsay angay namo nga buhaton? Daghang salamat. —  Rolly

Dear Rolly,

Base sa balaod, ang mga saop adunay security of tenure, nga buot ipasabot, nga dili basta-basta nga mapapahawa ang saop gawas lang kon kini adunay balido nga rason, o boluntaryo niyang iuli ang yuta.

Bisan gani kon ibaligya sa lot owner ang property, dili kini igong basehan nga papahawaon ang saop tungod lang kay bag-o na ang owner sa yuta nga iyang gitikad.

Ang maayo ninyong buhaton mao ang pagduol og abogado aron inyong tubagon ang demand letter. Mahimo sab kamo nga modangop, o mopasaka og reklamo ngadto sa DAR batok sa lot owner nga kalit lang ninyong mopapahawa sa yuta nga inyong gitikad. Thanks and God bless.- Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.