Palpak nga PR sa NEDA
Nagkapuliki og panagang ang National Economic Development Authority sa mga pagsaway nga ilang naangkon gikan sa publiko nunot sa kontrobersiya nga namugna atol sa ilang press conference diin tinguha unta sa maong buhatan nga ipasabot sa katawhan ang epekto sa inflation.
Basi man gud sa labing awahing datus, ang inflation rate sa nasud miabot na og 4.6 porsiyento niadtong buwan sa Mayo. Aron ipasabot ang paspas nga pagtidlom sa balor sa atong kwarta, gihimo sa mga opisyal sa NEDA ang press conference niadtong Hunyo 5.
Sa tinguha nga masabtan sa yanong lungsoranon unsa ang inflation, si Undersecretary Rosemarie Edillon misuway paghubad niini pinaagi sa paghimong sanglitanan sa usa ka pamilya nga dunay lima ka sakop ug P10 mil nga income matag buwan.
Gamit ang maong kantidad iyang gibahin-bahin sa mga panginahanglan sa pamilya. Dinhi nagsugod ang problema tungod kay inay masabtan sa publiko nisamot hinuon ang kalibog ug sayop nga pagsabot. Nagtuo ang katawhan nga alang sa NEDA kun ang usa ka pamilya nga dunay lima ka membro magpuyo na nga haruhay ug desente nga kinabuhi sa P10 mil nga income matag buwan.
Mas nisinta ang katawhan dihang nakakita giunsa pagbahin-bahin sa NEDA ang maong kantidad. Tiaw bay ang budget alang sa abang sa pinuy-anan P1,200? Dili hinuon nimo mabasol ang pag-alburoto sa kadaghanan tungod sa sayop nga kasayuran nga ilang nadawat. Ug alang nako wa say laing mabasol niini kun dili ang mga opisyal ra sab sa NEDA tungod sa palpak nila nga PR.
Ang mas simple man gud unta nga hubad niini mao nga tungod sa inflation, ang P10 mil nga income matag buwan makibhangan ang balor niini og P460 tungod sa 4.6 percent nga inflation. Sa ato pa, ang aktuwal nga balor sa imong P10 mil anaa na lang sa P9,540.
Hinaut nakakat-on og leksiyon ang atong gobyerno sa nahitabong bulilyaso sa NEDA. Gikinahanglan nila ang maantigo nga PR aron mapadangat nga husto ang mensahe nga buot nilang ipaabot sa publiko.
Sa ingon niini malikayan ang kaguliyang ug dili makatarunganon nga mga pagsaway gikan sa publiko.
Tiaw mo nga tungod niadtong maong hitabo gihagit na man hinuon sa kadaghanan ang mga opisyal sa gobiyerno nga suwayan unsaon nila pagpaigo ang P10 mil nga income matag buwan.
Sa sitwasyon karon nga dyutay na lang kaayo ang mapalit sa imong kwarta tungod sa pagsulbong sa presyo sa mga palaliton, angayang mag-amping ug sensitibo kanunay ang mga opisyal sa kagamhanan sa ilang luwatan nga mga pamahayag.
* * *
- Latest
