Senyales sa atay nga puno sa toksins (3)

Sa ato na nga nasabtan, ang atay nga naumol sa grabeng mga toksins maoy nakapaluya sa trabaho niini, ug ang nanubra nga katambok, nga maisip nga makahilong hugaw, makapahimo kanato nga masakiton.

Kinahanglan nga kon unsa may nakaingon niini, tinguhaon nato ang pagbag-o sa estilo sa kinabuhi, kay makomplikado ang lawas kon dili na hingpit  nga makaserbisyo ang atay alang sa kahimsog sa panglawas.

Hinuon kon sa atong pamati, aduna na’y gihambin nga problema ang atong atay, kabuhatan dayon og aksyon nga maalibyohan kini nga mabalik sa maayong kondisyon. Unsa man ang mga paagi niini?

Aron ang atay mahaw-asan sa tambok, unahon ang pagpraktis sa husto nga pagdiyeta. Kinahanglang kanunay maapil sa pagkonsumo ang sama sa gamot sa dandelion (dandelion roots), kamote, saging, atay, ug luy-a, kay nasulayan kini nga makapamenos sa tambok sa atay.

Ang buntagon nga smoothies, nga konsumohon kada adlaw, usa sab kini sa epektibo nga solusyon, nga gilangkoban sa mga natural ‘superpower’ nga ingrediyentes sa imong pagkaon.

Busa, sayon kaayo nga makahimo ka sa kinaugalingon nga mag-‘smoothie’, nga igo mo lang sagolon ang dandelion, saging, ug luy-a, para ikombate sa sakit sa atay. Sulayi dayon kay aron imong masinati ang maayong resulta.

Unsaon man ang pagpreparar sa smoothie?  Hiwaa, o tsapsapa ang saging, uban ang 1 ka tasa nga greek yogurt, 2 ka kutsara nga peanut butter, linusak sa luy-a ug 1 ka kutsara sa pinulbos nga gamot sa dandelion. Ibutang sa blender ug paandaron aron mahimong smoothie. Inighuman, moinom ka niini kaduha sa usa ka adlaw.