Lumolupyo nangayo’g tabang sa media

Sagad sa namuyo sa Sitio San Miguel, Barangay Apas, Cebu City, mga pamilya sa retired military officials nga nagpuyo sa maong dapit mga 30 ngadto sa 50 ka tuig na.

Apan ang kalinaw sa ilang pamuyo, kalit lang gitugaw kaniadtong Mayo 27 dihang usa ka kongresista sa Caloocan City nga si Edgar Erice kuyog sa usa ka abogado nga si Ben Militar mipahibalo nga ang luna nga ilang giukopar gibaligya na sa tag-iya ug maoy gusto sa nakapalit nga papahawaon na sila.

Si Jumar Orbillos, usa sa mga nagpuyo sa lugar, mihangyo nga magpatabang unta sila sa media aron ang ilang problema matagad sa mga opisyal sa kagamhanan.

Matud ni Orbillos nga wala na siya’y maayong kinatulgan sa pagsige’g hunahuna sa ilang problema. Unsaon, dinhi siya natawo, nagdako ug hangtud nga naminyo, ug wala gyud magtuo nga moabot kining panahon nga sila giabisohan na aron papahawaon.

Gitug-an ni Orbillos nga ang orihinal nga tag-iya sa maong yuta dugay na nga nabayran sa gobiyerno. Gani, may gikuptan man silang Court Archive’s receipt pagmatuod sa iyang alegasyon.

Hinungdan, nga nakapangutana siya sa kaugalingon kon nganong miingon man si Kongresista Erice ug Atty. Militar nga gibaligya na kini sa tag-iya, nga kon buot hunahunaon gobiyerno na man ang tag-iya niini? Gobiyerno lang usab unta ang makapahawa nila. Kay dia man sa siyudad sa Sugbo ang huridiksiyon ning maong luna, akong gitambagan si Jumar Orbillos nga si Mayor Tommy Osmeña ra gyud ang makahatag nila’g tabang nga masulbad ang ilang suliran. Naglaum ang mga lumolupyo nga paboran gyud sa mayor ang ilang yangungo, labi na kay sa sunod tuig local election na usab.