Gisuwayan og guba

Gipasiugdahan sa buhatan ni Special Assistant to the President Bong Go ang Malasakit Program pinaagi sa pagbutang og Malasakit Center dinhi sa Sugbo nga anaa sa Vicente Sotto Memorial Medical Center.

Gipundohan kini ni Presidente Rodrigo Duterte og pasiuna nga P50 milyones, ug dugangan kon mahurot na kini paggasto ang kuwarta. Ang Malasakit Center usa ka ‘one stop shop’ alang niadtong nagkinahanglan og ayuda nga medical.

Naglangkob sa mga ahensya nga nagsuporta sa Malasakit program sa presidente ug mapangayoan og tabang mao ang Philhealth, Department of Health (DOH), Philippine Charity Sweepstakes Office (PCSO) ug Department of Social Welfare and Development (DSWD). Ang programa nga Malasakit mapahimudsan kini sa mga pasyente nga malandig sa Vicente Sotto Memorial Medical Center, Saint Anthony Hospital dinhi sa dakbayan, ug Talisay City District Hospital sa lalawigan sa Sugbo.

Puwede usab nga makapahimulos niini ang mga out-patient sa nahisgotang mga tambalanan. Ang Malasakit program gisugdan na usab  pagpakatap sa laing mga dapit sa Visayas, ug sa ubang bahin sa nasud.Maingon nato nga bulahan ang mga taga Cebu tungod kay dinhi gyud  sugdi ug buksi ang programang dako og ikatabang sa mga pasyenteng nanginahanglan.

Apan nakasugat og suliran ang Malasakit tungod kay adunay mga tawo nga misuway sa pagsabotahi sa makatabang nga programa. Ang nahitabo may pasyente nga mireklamo tungod kay siya gibalibaran human magpakitabang tungod kay matud pa wala’y pundo ang programa.

Apan dali nga gipanghimakak sa mga nagdumala sa Malasakit Center ang reklamong wala kuno’y pundo nga kuwarta tungod kay bag-ohay pa lang gani nga mipagawas og P50 milyones si Presidente Duterte para sa nahisgotang programa.

Ngano gyud kaha nga aduna may mga tawo nga walay mga lingaw nga mao pa gyu’y himoong kalingawan ang mga nanginahanglan og tabang? Duda nako nga tumong ning mga tawhana ang pagguba sa maayong programa. Tingali, ang ilang gihimo bunga lang sa kasina.