Sagupon aron apilyedo magamit

Dear Atty. Divine,

Aduna ko’y 3-year old nga anak sa akong previous relationship. Wa gi-acknowledge sa papa ang bata ug wa gani magpakita pagkahibawo nga nabuntis ko.

Karon, may boyfriend ko nga gustong mangasawa nako kay midawat siya nako bisan disgrasyada ko ug gidawat usab niya ang akong anak.

Magpakasal na kami next month ug gusto niya nga siya na ang mabutang nga amahan sa birth certificate sa bata. Iyang gi-suggest nga among ipa-late registration ang bata aron mabutang ang iyang name as father sa birth certificate sa bata.

Ang akong pangutana kon mahimo ba kini namong buhaton nga nahuman na man og rehistro ang bata atol sa iyang pagkatawo? Unsa’y among buhaton? Daghang salamat.- Glenda

* * *

Dear Glenda,

Dili mahimo nga inyong ipa-late register ang Birth Certificate sa imong anak kay magdoble na ang iyang registration ug makonsiderar usab nga Simulation of Birth ang inyong buhaton pagbutang sa imong bana isip amahan bisan kon dili siya ang biological father sa bata.

Gawas pa, kon double registration ra ba, ang first registration maoy mo-prevail, o mopatigbabaw. Kinahanglan sab nga moagi ka sa korte kon pananglit maka-decide ka to cancel sa second registration sa umaabot nga panahon tungod sa mga posibleng problema nga motumaw unya sa iyang birth records.

Ang legal nga paagi aron mahimong amahan sa imong anak ang umaabot nimong bana mao ang pagpasaka og Petition for Adoption sa korte. Sagupon sa imong bana ang imong anak ug kon ma-grant kini sa court, mandoan sa korte ang Civil Registrar sa pag-usab sa Birth Certificate sa imong anak ug ang apelyido unya sa imong bana maoy gamiton sa  bata ug ang imong bana mao sab unya ang mabutang nga amahan sa imong anak sa iyang birth certificate. Thanks and God bless. - Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.